«Ҳозир бундай истиқболлар кўринмаяпти». Песков — урушни дипломатия йўли билан тугатиш эҳтимоли ҳақида

Россия президенти матбуот котиби Дмитрий Песковнинг айтишича, Кремль ҳозирда Украинадаги урушни «сиёсий ва дипломатик йўллар билан» тугатиш имкониятини кўрмаяпти.

«Ҳозирда бундай истиқболлар кўринмаяпти», — деган Песков «Интерфакс»га.

Сентябрь ўрталарида Самарқандда бўлиб ўтган Шанхай ҳамкорлик ташкилоти саммитида Россия президенти Владимир Путин Ҳиндистон бош вазири Нарендра Моди билан учрашувда Россия Украина билан урушни имкон қадар тезроқ тўхтатиш учун ҳамма нарсани қилишга тайёрлигини, бироқ Киев музокарадан бош тортаётганини айтган.

ШҲТ саммитида Путин билан учрашган Туркия президенти Ражаб Тоййиб Эрдўғон ҳам Россия президенти урушни имкон қадар тезроқ тугатиш тарафдори эканини маълум қилди. Туркия расмийлари Украина ва Россия президентлари ўртасида учрашувлар ташкил этишга тайёр эканини бир неча бор таъкидлаган. Украина президенти офиси раҳбари маслаҳатчиси Михаил Подолякнинг айтишича, Зеленский ва Путин ўртасидаги музокаралар фақат келажакда бўлиб ўтиши ва унда Россия томонининг босқин учун тўлаши керак бўлган товон миқдори муҳокама қилиниши мумкин.