Yetakchi kriptovalyutalarning kotirovkalari iyun oyidan beri eng past qiymatga tushdi. 19-sentabrda bitkoin kursi 18,3 ming dollargacha, Ethereum esa 1,28 ming dollargacha pasaydi va hafta davomida o‘z qiymatining 16—28 foizini yo‘qotdi.
Investorlar Federal rezerv tizimi (Fed) tomonidan keskin stavka o‘sishini kutib virtual valyutalarga investitsiyalarni kamaytirmoqda.
Agar Fed rejalari pul-kredit siyosatini agressiv tarzda kuchaytirishda davom etsa, bitkoin kotirovkalari 12 ming dollargacha tushishi mumkin, deydi tahlilchilar.
CoinDesk portalidagi ma’lumotlarga ko‘ra, 19-sentabr kuni bitkoin narxi 18,3 ming dollargacha tushib ketdi, bu 19-iyundan beri eng past ko‘rsatkichdir.
Bu avvalgi kunning yopilishidan 6 foizga past. Toshkent vaqti bilan o‘sha kuni 19:45 ga kelib, kurs yo‘qolgan qiymatining bir qismini qaytarib oldi va 19,4 ming dollarga yetdi.
Ammo oyning birinchi o‘n kunligida qabul qilingan mahalliy maksimal darajadan 16 foiz pastligicha qolmoqda.
Hafta davomida Binance Coin, Cardano va Solana ham 10—14 foiz narxini yo‘qotdi va ikki hafta oldingi darajaga qaytdi.
Butun kriptovalyuta bozorining kapitallashuvi hafta davomida 100 mlrd dollardan ko‘proqqa qisqarib, 928 mlrd dollarni tashkil etdi.
Raqamli valyutalarning tushishining asosiy sababi AQSHdagi yuqori inflyatsiya sharoitida Fed tomonidan bazaviy stavkaning agressiv o‘sishi xavfi bo‘ldi.
Toshkent vaqti bilan 20-sentabr soat 10:30 ga kelib bitkoinning narxi 19 394 dollar bo‘lib turibdi. Ethereum esa 1 365 dollarga baholanmoqda.
Avvalroq Dunyodagi ikkinchi yirik kriptovalyutaning dasturiy ta’minoti yangilangani haqida xabar berilgan edi.
Izoh (0)