Биткоин 12 минг долларгача пасайиши кутилмоқда: Криптовалюта бозорида вазият қандай?

Етакчи криптовалюталарнинг котировкалари июнь ойидан бери энг паст қийматга тушди. 19 сентябрда биткоин курси 18,3 минг долларгача, Ethereum эса 1,28 минг долларгача пасайди ва ҳафта давомида ўз қийматининг 16—28 фоизини йўқотди. 

Инвесторлар Федерал резерв тизими (Фед) томонидан кескин ставка ўсишини кутиб виртуал валюталарга инвестицияларни камайтирмоқда. 

Агар Фед режалари пул-кредит сиёсатини агрессив тарзда кучайтиришда давом этса, биткоин котировкалари 12 минг долларгача тушиши мумкин, дейди таҳлилчилар.

CoinDesk порталидаги маълумотларга кўра, 19 сентябрь куни биткоин нархи 18,3 минг долларгача тушиб кетди, бу 19 июндан бери энг паст кўрсаткичдир. 

Бу аввалги куннинг ёпилишидан 6 фоизга паст. Тошкент вақти билан ўша куни 19:45 га келиб, курс йўқолган қийматининг бир қисмини қайтариб олди ва 19,4 минг долларга етди. 

Аммо ойнинг биринчи ўн кунлигида қабул қилинган маҳаллий максимал даражадан 16 фоиз пастлигича қолмоқда. 

Ҳафта давомида Binance Coin, Cardano ва Solana ҳам 10—14 фоиз нархини йўқотди ва икки ҳафта олдинги даражага қайтди. 

Бутун криптовалюта бозорининг капиталлашуви ҳафта давомида 100 млрд доллардан кўпроққа қисқариб, 928 млрд долларни ташкил этди.

Рақамли валюталарнинг тушишининг асосий сабаби АҚШдаги юқори инфляция шароитида Фед томонидан базавий ставканинг агрессив ўсиши хавфи бўлди.

Тошкент вақти билан 20 сентябрь соат 10:30 га келиб биткоиннинг нархи 19 394 доллар бўлиб турибди. Ethereum эса 1 365 долларга баҳоланмоқда. 

Аввалроқ Дунёдаги иккинчи йирик криптовалютанинг дастурий таъминоти янгилангани ҳақида хабар берилган эди.