Бухоро шаҳридаги 2-умумий ўрта таълим мактаби синфхоналаридан бирининг шифти қулаб тушди. Бу ҳақда воқеа жойида бўлган «Дарё» мухбири хабар берди.
Маълум қилинишича, 18 сентябрь куни тунда 2-умумий ўрта таълим мактабининг 10-синф ўқувчилари таҳсил оладиган синфхона шифти қулаб тушган. Шифтга ўрнатилган пластик материал тушиб, тупроқларининг тўкилиб кетишига сабаб бўлган.
Шу куни тунда навбатчиликда бўлган мактаб қоровули Дмитрий Старсевнинг «Дарё»га маълумот беришича, у тахминан соат 24:00 дан кейин мактабнинг барча синфхоналарини кўздан кечирган. Бу пайтда синфхонада бу ҳолат рўй бермаган.
Тун ярмида мактабнинг барча синфхоналарини ҳар доимгидек бирма-бир кўздан кечирдим. Мактаб қоровулхонаси талафот етган синфдан 50-70 метрча узоқ масофада жойлашган. Мен назорат қилиб чиққан пайтимда ҳеч қандай кўнгилсизлик кузатилмаган эди», — дейди Дмитрий Старсев.
Мактаб директори Замира Аҳмедованинг сўзига кўра, шу пайтгача шифтининг ярми тушиб кетган синфхонада ёхуд мактабнинг бошқа синфхоналарида қурилишдаги камчилик кўзга ташланмаган.
Мактабимиз иккита бинодан иборат бўлиб, бири 1937 йили 330 ўринли, иккинчи биноси эса 1980 йилда 600 дан ортиқ ўринга мўлжаллаб қурилган. Мактабимизда ўқиш талаби жуда юқори. 2218 нафар ўқувчи икки сменада таҳсил олади. 26 йилдан буён директорлик қилиб келаман, аммо шу йиллар давомида юқори турувчи ташкилотларга бирор маротаба таъмирлаш ёхуд тўлиқ реконструкция қилиш масаласида мурожаат қилмаганмиз. Ҳар доим ўз кучимиз, ота-оналарнинг ихтиёрий ташаббуслари ва ҳомийлар кўмагида мактабимизни замонавий мактаблардан қолишмайдиган даражада сақлаб, асраб келганмиз. Биринчи бинонинг ёғоч тахтадан иборат эскирган шифт қисмларини уч йил илгари пластик қурилиш материали билан мустаҳкам қоплаганмиз. Ёғочларнинг эскиргани сабаб бинонинг иккинчи қаватидаги 33-хона, яъни 10-«V» синф ўқувчиларига мўлжалланган синфхона шифтининг ярми ўпирилиб тушиб, қумлари тўкилишига сабаб бўлган», — дейди Замира Аҳмедова.
Мактаб масъуллари ҳолатдан 19 сентябрь куни тонгги 08:00 ларда хабар топган. Шифти талафот кўрган синфхона раҳбари хонани очган ва ҳолатга гувоҳ бўлган. Зудлик билан тегишли идора ва ташкилотларга хабар берилган.
Тун ярмидан оғганда, пластик материал остидаги ёғоч тахталар бир-бир тўкилган ва шу боис, гумбирлаган ёхуд, кескин «тарақ-туруқ» товуш чиқармаган, деган хулосага келдик. Мактаб қоровули ҳам ҳолатдан хабарсиз қолган. Ҳеч ким жабрланмаган ва жароҳат олмаган. Ўқув жараёнини тўхтатмаслик ҳамда синф ўқувчиларини хона билан таъминлаш мақсадида зудлик билан амалий чораларни кўрдик. Айни пайтда ушбу синф ўқувчилари мактаб кутубхонасига жойлаштирилди. Дарс соатлари бир соат ҳам қолдирилмади. Бино фойдаланишга топширилганига 85 йилдан ошган бўлса-да, сақланиши ва асралган ҳолати замонавий мактаблардан қолишмайди», — дейди Бухоро шаҳар ХТБ бошлиғи Мурод Маттиев.
Мактаб директорига кўра, вилоятнинг қурилиш соҳасидаги мутахассислари томонидан бинода ўрганиш ва экспертиза ишлари олиб борилмоқда.
Экспертлар хулосасига кўра, мактабимиз тўлиқ реконструкция қилинади ёхуд талафот етган ва талафот етиши мумкин бўлган қисмлари мустаҳкамланади», — дейди мактаб директори.
Изоҳ (0)