Qirg‘iz-tojik chegarasining butun perimetri bo‘ylab shiddatli janglar davom etmoqda, deya ma’lum qildi Qirg‘iziston Milliy xavfsizlik davlat qo‘mitasi. Qirg‘iziston rasmiylari Tojikiston og‘ir zirhli texnika va “Grad” baravar o‘t ochuvchi reaktiv tizimlaridan foydalanayotganini da’vo qilmoqda.
Qirg‘iziston hukumati chegara hududlari aholisini evakuatsiya qilishni boshlagani xabar berilgandi. Qirg‘izistonning Botken viloyatidagi to‘qnashuvlar tufayli mamlakat shimoli va janubini bog‘laydigan yagona yo‘l qisman to‘sib qo‘yilgan.
Tojikiston Milliy xavfsizlik davlat qo‘mitasining chegara qo‘shinlari o‘t ochishda qirg‘iz tomonini aybladi. Qo‘mitaning iddao qilishicha, Tojikiston ertalab ikki marta muzokara o‘tkazishni taklif qilgan, biroq Qirg‘iziston bunga e’tibor bermagan. Milliy xavfsizlik davlat qo‘mitasi Qirg‘izistonni ijtimoiy tarmoqlar orqali tojik tomonini obro‘sizlantirishda aybladi.
Dushanbening vaziyatni barqarorlashtirish bo‘yicha urinishlari besamar ketdi”, — deyiladi qo‘mita xabarida.Qirg‘iziston chegara xizmati esa tomonlar muzokara o‘tkazganini va ertalab soat 10:00 dan (Toshkent vaqti bilan 9:00) o‘t ochishni to‘xtatishga kelishib olganini, biroq otishmalar davom etganini ma’lum qilgan.
Qirg‘iziston Sog‘liqni saqlash vazirligining so‘nggi ma’lumotlariga ko‘ra, otishma paytida yaralangan qirg‘izlar soni 30 kishidan oshdi. Tojikiston tomoni 2 harbiy xizmatchisi halok bo‘lgani haqida xabar bergan.
Tojikiston va Qirg‘iziston chegarasida vaziyat 14-sentabrda keskinlashdi. Qirg‘iziston tomonining so‘zlariga ko‘ra, tojik chegarachilari chegarada jangovar pozitsiyalarni egallab, ularni tark etishdan bosh tortgan. Chegaraning bir qancha uchastkalarida to‘qnashuvlar sodir bo‘ldi.
Izoh (0)