Afg‘oniston shimoliga ISHID terror tashkilotining 400 nafar jangarisi joylashtirilgan. Bu haqda 15-sentabr kuni bo‘lib o‘tgan brifingda Kollektiv xavfsizlik shartnomasi tashkiloti (KXSHT) birlashgan shtabi rahbari general-polkovnik Anatoliy Sidorov ma’lum qildi.
Sidorovning ta’kidlashicha, jangarilar Afg‘oniston shimolidagi Badg‘iz, Juzjon, Qunduz, Taxar va Badaxshon viloyatlariga “terrorchilik hujumlarini amalga oshirish hamda fuqaro va harbiy obyektlarga hujum qilish maqsadida” yuborilgan.
Uning so‘zlariga ko‘ra, Afg‘onistonda yuqori darajadagi terrorchilik harakatlari saqlanib qolmoqda, 2022-yilda respublikada 250 ga yaqin kishi teraktlar qurboni bo‘lgan, mingdan ortiq kishi jarohatlangan.
“Shu bilan birga ‘Tolibon’ rahbariyatining yuqori mansabdor shaxslari hujumlarning asosiy obyektiga aylandi”, — deya xulosa qildi shtab rahbari.
5-sentabr kuni ertalab Rossiyaning Kobuldagi diplomatik missiyasi konsullik bo‘limiga kirish darvozasi yaqinida portlash yuz bergandi. Hodisa oqibatida Rossiya elchixonasining ikki xodimi — qo‘riqchi va diplomat halok bo‘lgan. Al Jazeera telekanali Afg‘oniston xavfsizlik xizmatidagi manbasiga tayanib xabar berishicha, jami sakkiz kishi halok bo‘lib, 15 kishi yaralangan.
Izoh (0)