Qozog‘iston parlamenti palatalarning qo‘shma yig‘ilishida mamlakat konstitutsiyasiga o‘zgartirishlar kiritish to‘g‘risidagi qonunni ikki o‘qishda qabul qildi. Hujjatni yig‘ilishda qatnashgan barcha 50 nafar senator va 99 nafar deputat bir ovozdan qo‘llab-quvvatlagan. Parlamentda qabul qilingan qonun imzolash uchun Qozog‘iston prezidentiga yuboriladi.
Qabul qilingan tuzatishlar quyidagilarni nazarda tutadi:
- Qozog‘istonda prezidentlik muddati besh yildan yetti yilgacha uzaytiriladi, prezident esa ikkinchi muddatga qayta saylana olmaydi;
- Mamlakat poytaxtining Nur-Sulton nomi avvalgi – Ostonaga qaytariladi.
Sentabr oyida Qozog‘iston prezidenti Qosim-Jo‘mart To‘qayev navbatdan tashqari prezidentlik saylovlarini 2022-yilning kuzida o‘tkazishni taklif qilgan edi. Shuningdek, u prezidentlik muddatini yetti yilga uzaytirish tashabbusi bilan chiqqan. Bundan tashqari To‘qayev Nur-Sulton nomini Ostona deb o‘zgartirish tarafdori bo‘lgan deputatlarning taklifini qo‘llab-quvvatlagan.
Qozog‘iston poytaxtining nomi 2019-yil mart oyida Qosim-Jo‘mart To‘qayevning tashabbusi bilan Ostonadan Nur-Sultonga o‘zgartirilgan edi.
Izoh (0)