Ukrainaning Xarkov viloyatida joylashgan, yaqinda ukrain armiyasi tomonidan ozod etilgan Izyum shahri chekkasidagi o‘rmondan ommaviy qabrlar topildi, deb yozadi Meduza. “Nastoyashcheye vremya” telekanali voqea joyidan olingan fotosuratlarni e’lon qildi.
Telekanal xabar qilishicha, ushbu tasvirlarni ukrainalik jurnalistlar taqdim etgan. Suratlarda xochlarni ko‘rish mumkin, ularning ko‘pchiligi taxtalarni sindirib yasalgan. Ba’zi xochlarda yozuvlar — ism-shariflar va sanalar bor. Xochlardan biriga “UQK, 17 kishi, Izyum sh., morgdan” deb yozib qo‘yilgan. Qabrlarning bir qismiga esa xochlar o‘rnatilmagan.
Ukrainaning alohida holatlarda bedarak yo‘qolgan shaxslar bo‘yicha vakili Oleg Kotenko (u Izyumga borib kelgan) tasvirlarning haqiqiyligini tasdiqlagan. Telekanal efirida u Ukraina tomoni shunday qabrlar borligini bilgani, bu haqda ular rossiyalik harbiylar joylagan videolar orqali xabar topgani va Izyum ozod etilganidan so‘ng ularni qidirib topganini ma’lum qildi.
Kotenkoning so‘zlariga ko‘ra, u joyda yuzlab qabrlar bor. Ularga nechi kishi dafn etilgan, ular kim va qanday holatlarda halok bo‘lgan — bular hali aniq emas. Halok bo‘lganlar orasida harbiylar ham, oddiy fuqarolar ham borligi taxmin etilmoqda. O‘lim sanalariga qaraganda, tinch aholining kamida bir qismi Izyum Rossiya armiyasi tomonidan o‘qqa tutilganida halok bo‘lgan, dedi vakil.
Keyinroq Xarkov viloyati politsiyasining tergov boshqarmasi boshlig‘i Sergey Bolvinov Britaniyaning Sky News telekanaliga ma’lum qilishicha, bu joyga 440 ga yaqin odam dafn etilgan. “Aytishim mumkinki, bu yere ng katta ommaviy qabrlardan biri… unda 440 dan ortiq jasad bor. Bitta joyga 440 kishi dafn qilingan”, — dedi Bolvinov. Uning so‘zlariga ko‘ra, ba’zilar o‘ldirilgan, qolganlar artilleriyadan o‘qqa tutish chog‘ida va aviazarbalar oqibatida halok bo‘lgan. Jasadlarning barchasi Rossiyaning harbiy jinoyatlarini tergov qilish doirasida eksgumatsiya qilinadi, deya qo‘shib qo‘ydi Bolvinov.
Izyum shahri aprel boshida Rossiya qo‘shinlari tomonidan egallab olingan edi. Ukraina Qurolli kuchlari sentabr boshida, Xarkov viloyatidagi katta ko‘lamli qarshi hujum chog‘ida shahar ustidan nazoratni qaytarib oldi. Izyum ma’muriyati ma’lum qilishicha, shahar uchun janglar va istilo chog‘ida kamida ming nafar mahalliy aholi halok bo‘lgan.
Bahorda jurnalistlar sun’iy yo‘ldoshdan olingan tasvirlarda Donetsk viloyatining Mariupol shahri yaqinida bir nechta ommaviy qabrlarni aniqlagan edi, ushbu shahar Rossiya armiyasi istilosi natijasida deyarli vayron bo‘lgan. Ukraina hukumati hisob-kitoblariga ko‘ra, shaharda 20 mingdan ortiq tinch aholi halok bo‘lib, binolarning 95 foizi vayron bo‘lgan yoki zarar ko‘rgan.
Izoh (0)