Арманистон бош вазири Никол Пашинян арман-озар чегарасидаги ҳолат бўйича Россия президенти Владимир Путин билан телефонда суҳбат ўтказди, дея хабар беради «РБК».
Пашиняннинг сўзларига кўра, айни пайтда чегарадаги ҳолат «нисбатан тинч» бўлса-да, вазият ҳамон «анча таранг»лигича қолмоқда.
Икки давлат раҳбари ўртасидаги музокараларни Кремль ҳам тасдиқлади. Россия президентининг матбуот котиби Дмитрий Песковнинг аниқлик киритишича, суҳбат 15 сентябрь кечки вақтда бўлиб ўтган.
Арманистон ҳукумати матбуот хизматининг маълумотларига кўра, Пашинян АҚШ давлат котиби Антони Блинкен билан ҳам телефонда суҳбат олиб борган. Арман-озар чегарасидаги тўқнашувлар ҳақида фикр билдирар экан, давлат департаменти раҳбари АҚШ тинчлик ва музокаларга тайёр эканини айтган.
Бундан ташқари, Арманистон бош вазирининг Франция президенти Эммануэль Макрон билан телефондаги суҳбатлари ҳам айни шу мавзуда бўлган.
13 сентябрга ўтар кечаси Арманистон ва Озарбайжон қўшинлари ўртасида чегарада янги тўқнашувлар бошланган эди. Ҳар икки томондан жами 176 нафар аскар ҳалок бўлди. 15 сентябрь куни Ереван Боку билан сулҳга эришилганини эълон қилди. Шу куни кечқурун Коллектив хавфсизлик шартномаси ташкилоти миссияси можаро зонасидаги вазиятни баҳолаш учун Арманистонга келди.
Изоҳ (0)