Бугун, 14 сентябрдан Қозоғистон буғдой ва ун экспортига қўйилган чекловларни бекор қилди. Бу ҳақда мамлакат Қишлоқ хўжалиги вазирлиги хабар берди.
Аввалроқ Қозоғистоннинг озиқ-овқат хавфсизлигини таъминлаш мақсадида буғдой ва ун экспортига квота жорий этишга қарор қилинган эди.
Бироқ жаҳон бозоридаги вазият барқарорлашганидан ва Қозоғистонда ғалла ҳосилдорлиги бўйича ижобий прогнозлардан сўнг квотани бекор қилишга қарор қилинди.
Бугунги кунга қадар мамлакатнинг барча ҳудудларида ўрим-йиғим ишлари давом этмоқда. Ҳокимликлардан олинган маълумотларга кўра, 11,3 миллион гектар майдондаги ғалла ўриб олиниб, режанинг 69,8 фоизи бажарилган.
2022 йилнинг 7 ойи давомида Европага мамлакат томонидан 183,3 минг тонна қозоқ буғдойи жўнатилган, бу ўтган йилгидан (85,7 минг тонна) 2,1 баробар кўпдир.
Ўзбекистон Қозоғистон буғдойининг асосий харидори ҳисобланади. Жорий йилнинг биринчи чорагидаги маълумотларга кўра, мамлакат Қозоғистоннинг қарийб 40 фоиз буғдойини импорт қилган.
Жорий йилнинг 7 ойи давомида эса Ўзбекистон мамлакатдан 218,3 минг тонна буғдой уни сотиб олган.
Изоҳ (0)