Fitch Ratings 2022 йил учун глобал иқтисодий ўсиш прогнозини июнь ойида кутилган 2,9 фоиздан 2,4 фоизгача пасайтирди. Бу ҳақда агентлик расмий сайтидан маълум бўлди.
Европадаги газ инқирози, юқори инфляция ва жаҳонда пул-кредит сиёсатининг кескинлашуви суръатларининг тезлашиши иқтисодий истиқбол учун жиддий оқибатларга олиб келади, — дейилади ҳисоботда.
2023 йил учун глобал ялпи ички маҳсулотнинг ўсиш прогнози 2,7 фоиздан 1,7 фоизга туширилди.
Fitch прогнозларига кўра, евроҳудуд ва Буюк Британия иқтисодиёти жорий йилнинг охирида рецессия ҳолатига киради. АҚШ эса 2023 йил ўрталарида енгил рецессияга дуч келади.
Европа ялпи ички маҳсулоти, агентликнинг янги прогнозига кўра, газ инқирози оқибатлари туфайли 2023 йилда 0,1 фоизга қисқаради (июнь ойида 2,1 фоизга ўсиш кутилган эди).
Янги прогнозда Россиядан Европага газ етказиб беришнинг тўлиқ ёки деярли тўхтатилиши ҳисобга олинган.
Fitch экспертларининг қайд этишича, Европа Иттифоқининг муқобил етказиб бериш манбаларини топишга уринишларига қарамай, яқин келажакда минтақада газ етказиб бериш сезиларли даражада қисқаради, бу эса саноат секторига таъсир қилади.
2022 йил учун АҚШ иқтисодиётининг ўсиш прогнози 2,9 фоиздан 1,7 фоизга, 2023 йил учун 1,5 фоиздан 0,5 фоизгача пасайтирилган.
Хитой иқтисодиётининг тикланиши карантин чекловлари ва кўчмас мулк бозоридаги пасайиш билан чекланади. Шунинг учун биз Хитой ялпи ички маҳсулоти 2022 йилда 2,8 фоизга ва келгуси йилда 4,5 фоизга ўсишини кутмоқдамиз, — дейилади Fitch шарҳида.
Июль ойида Хитой иқтисодиётининг ўсиши мос равишда 3,7 фоиз ва 5,3 фоиз прогноз қилинган эди.
Ортиб бораётган инфляция кутилмалари сабаб дунёнинг етакчи марказий банклари базавий фоиз ставкаларни кутилганидан анча тезроқ ошириб бормоқда.
Fitch прогнозларига кўра, Фед жорий йил охиригача ставкани 4 фоизга кўтаради ва уни 2023 йил давомида шу даражада ушлаб туради.
Европа Марказий банки эса жорий йилнинг декабрига қадар асосий ставкасини 2 фоизга етказади.
Агентлик экспертларининг фикрича, Англия банкининг базавий ставкаси 2023 йилнинг февралига қадар 3,25 фоизга етади.
Аввалроқ Fitch Ratings томонидан Ўзбекистон кредит рейтинги барқарор даражада тасдиқланганди.
Изоҳ (0)