O‘zbekistonga jismoniy shaxslar tomonidan olib kelinadigan bir qator tovarlar uchun normalar bekor qilinmoqda. Bu haqda hukumatning tegishli qarori loyihasi jamoatchilik muhokamasiga qo‘yildi.
Vazirlar Mahkamasining 2018-yil 22-iyundagi “Jismoniy shaxslar tomonidan O‘zbekiston Respublikasiga tovarlarni olib o‘tish tartibini takomillashtirishga doir qo‘shimcha chora-tadbirlar to‘g‘risida”gi 463-son qarori bilan jismoniy shaxslar uchun mamlakatga olib kiriladigan mahsulotlar hajmiga cheklovlar o‘rnatilgan.
Shuningdek, mahsulotlarni mamlakat hududiga olib kirishda miqdoriy cheklovlar o‘rnatilgani sababli, ularni “yashil yo‘lak” orqali bojxona ko‘rigidan o‘tkazish imkonsiz bo‘lib, barcha jismoniy shaxslar “qizil yo‘lak” orqali bojxona ko‘rigidan o‘tkazilmoqda.
Qaror loyihasiga ko‘ra, Vazirlar Mahkamasining yuqoridagi qarori ilovasidan 20 va 21 bandlar chiqarib tashlanadi. Ilovada jismoniy shaxslar tomonidan O‘zbekiston davlat chegarasining avtoyo‘l (yo‘lovchi), temiryo‘l va daryo o‘tkazish punktlari orqali bojxona to‘lovlari undirilmaydigan ayrim tovarlarni olib o‘tishning miqdor normalari keltirilgan.
Qaror loyihasida aytilishicha, bu jahondagi oziq-ovqat mahsulotlari tanqisligi sharoitida aholini ijtimoiy ahamiyatga ega birlamchi mahsulotlar bilan ta’minlash, ichki bozorda oziq-ovqat mahsulotlari narxining oshib ketishining oldini olish, mamlakat fuqarolariga shaxsiy ehtiyojlari uchun mahsulotlarni olib kirishga shart-sharoit yaratish maqsadida qilinmoqda.
Ma’lumot uchun, prezidentning 2018-yil 8-fevraldagi qaroriga muvofiq, jismoniy shaxslar tomonidan respublikaga avtoyo‘l (piyoda) bojxona chegaralari o‘tish punktlari orqali 300 dollarigacha bo‘lgan mahsulotlarni bojxona to‘lovlarisiz olib o‘tish mumkin.
Izoh (0)