Ўзбекистонга жисмоний шахслар томонидан олиб келинадиган бир қатор товарлар учун нормалар бекор қилинмоқда. Бу ҳақда ҳукуматнинг тегишли қарори лойиҳаси жамоатчилик муҳокамасига қўйилди.
Вазирлар Маҳкамасининг 2018 йил 22 июндаги «Жисмоний шахслар томонидан Ўзбекистон Республикасига товарларни олиб ўтиш тартибини такомиллаштиришга доир қўшимча чора-тадбирлар тўғрисида»ги 463-сон қарори билан жисмоний шахслар учун мамлакатга олиб кириладиган маҳсулотлар ҳажмига чекловлар ўрнатилган.
Шунингдек, маҳсулотларни мамлакат ҳудудига олиб киришда миқдорий чекловлар ўрнатилгани сабабли, уларни «яшил йўлак» орқали божхона кўригидан ўтказиш имконсиз бўлиб, барча жисмоний шахслар «қизил йўлак» орқали божхона кўригидан ўтказилмоқда.
Қарор лойиҳасига кўра, Вазирлар Маҳкамасининг юқоридаги қарори иловасидан 20 ва 21 бандлар чиқариб ташланади. Иловада жисмоний шахслар томонидан Ўзбекистон давлат чегарасининг автойўл (йўловчи), темир йўл ва дарё ўтказиш пунктлари орқали божхона тўловлари ундирилмайдиган айрим товарларни олиб ўтишнинг миқдор нормалари келтирилган.
Қарор лойиҳасида айтилишича, бу жаҳондаги озиқ-овқат маҳсулотлари танқислиги шароитида аҳолини ижтимоий аҳамиятга эга бирламчи маҳсулотлар билан таъминлаш, ички бозорда озиқ-овқат маҳсулотлари нархининг ошиб кетишининг олдини олиш, мамлакат фуқароларига шахсий эҳтиёжлари учун маҳсулотларни олиб киришга шарт-шароит яратиш мақсадида қилинмоқда.
Маълумот учун, президентнинг 2018 йил 8 февралдаги қарорига мувофиқ, жисмоний шахслар томонидан республикага автойўл (пиёда) божхона чегаралари ўтиш пунктлари орқали 300 долларигача бўлган маҳсулотларни божхона тўловларисиз олиб ўтиш мумкин.
Изоҳ (0)