Farg‘ona viloyati Qo‘qon shahrida chet davlatga ishlagani ketmoqchi bo‘lgan ayol eri tomonidan pichoqlandi. Bu haqda “Zamon” informatsion dasturida xabar berildi.
Qayd etilishicha, qo‘qonlik fuqaro A. va dang‘aralik A. 2015-yilda turmush qurib, bir nafar farzandli bo‘lishgan.
Ular Qo‘qon shahridagi kvartiralardan birida vaqtincha yashab kelayotgan bo‘lgan. Bir kun er-xotin o‘rtasida kelishmovchilik yuzaga kelgan va ayol arazlab, onasining uyiga chiqib ketgan. Qaynona-qaynotasi ayolning ona uyiga borishganda u uyiga bormagani, balki singlisinikida yashab kelayotgani ma’lum bo‘lgan.
Keyinroq ayol turmush o‘rtog‘iga qo‘ng‘iroq qilib, Turkiya davlatiga ketayotgani, oyiga 200 dollar jo‘natib turishini va o‘g‘liga g‘amxo‘rlik qilib turishini aytgan. Eri esa xotiniga xato qilayotganini aytib, uni bu fikridan qaytarishga uringan. Oradan 4-5 kun o‘tgach o‘zlarining vaqtincha ijarada turgan uyida ko‘rishishganda janjal yuzaga kelgan.
Janjal davomida erkak xotinini avval tanasining turli joylariga qo‘li bilan urib, so‘ngra o‘ng ko‘z qovog‘i va ko‘krak qafasining chap sohasiga pichoq bilan urib, hayot uchun xavfli tan jarohatlari yetkazgan.
Holat yuzasidan jinoyat ishi ochilib, qonuniy baho berilishi uchun sudga yuborilgan. Jinoyat ishlari bo‘yicha Qo‘qon shahar sudi tomonidan sudlanuvchiga Jinoyat kodeksining 104-moddasi (qasddan badanga og‘ir shikast yetkazish) 2-qismi “l” bandida ko‘rsatilgan jinoyatni sodir etgan deb topilib, unga nisbatan 5 yil muddatga ozodlikdan mahrum qilish jazosi tayinlangan. Jazo qattiq tartibdagi kolonnalarda o‘talishi belgilangan.
Izoh (0)