O‘zbekistonning Saudiya Arabistonining Jidda shahridagi Bosh konsulxonasi tomonidan mamlakatda ishlab chiqarilgan va yetishtirilgan mahsulotlar eksporti hajmini oshirish maqsadida Vision Development kompaniyasi bosh direktori Mujahid Xan Abrar Xan bilan uchrashuv tashkil etildi. Bu haqda “Dunyo” axborot agentligi xabar qildi.
Qayd etilishicha, suhbat davomida jiddalik tadbirkorning e’tiboriga O‘zbekistonda iqtisodiyotni liberallashtirish va tashqi savdoni rivojlantirish yo‘lidagi islohotlar, xorijiy importchilar uchun yaratilgan biznes qulayliklar, respublikadagi eksportyorlik muhitining jozibadorligi hamda erkin iqtisodiy hududlar faoliyati haqidagi batafsil ma’lumotlar havola etilgani barobarida O‘zbekistondagi BMB Trade Group kompaniyasi mahsulotlarining taqdimoti ham o‘tkazilgan.
Vision Development kompaniyasi bosh direktori Mujahid Xan quruq mevalar va za’faronni O‘zbekistondan Saudiya Arabistoniga olib kelishga qiziqish bildirgan. U O‘zbekiston kompaniyalari bilan hamkorlik o‘rnatish asnosida o‘zbek mahsulotlarining podshohlikka importini yo‘lga qo‘yishga tayyor ekanini ma’lum qilgan.
Xususan, Mujahid Xan BMB Trade Group kompaniyasi bilan o‘zaro hamkorlikni yo‘lga qo‘yib, mazkur kompaniyaning Saudiya Arabistonida dillerlik xizmatini ko‘rsatishga ham tayyorligini aytgan.
Vision Development kompaniyasi bosh direktori joriy yil 14-sentabr kuni Jidda shahrida bo‘lib o‘tadigan O‘zbekiston—Saudiya biznesmenlari uchrashuviga ham taklif etilgan.
Izoh (0)