Эрон ядровий дастури бўйича Қўшма кенг қамровли ҳаракатлар режасини қайта тиклаш бўйича келишувлар Теҳроннинг хатти-ҳаракатлари туфайли даргумон бўлиб қолмоқда. Бу ҳақда АҚШ Давлат котиби Энтони Блинкен Мехико шаҳрида АҚШ—Мексика иқтисодий мулоқоти йиғилиши якунлари бўйича ўтказилган матбуот анжуманида айтиб ўтди.
«Ўтган ҳафтада гувоҳ бўлганимиздек, Эроннинг Европа Иттифоқи таклифига берган жавоби орқага қадам ташлаш бўлмоқда ва яқин муддатда келишувга эришиш истиқболларини даргумон қилмоқда», — деди Блинкен.
Унинг таъкидлашича, Эрон келишувга эришиш учун зарур шартларни бажаришни истамайди ёки бунинг уддасидан чиқолмайди, чунки Теҳрон мавзудан ташқари бўлган кун тартибини киритишда давом этмоқда.
«Сизга аниқ муддатни айта олмайман, фақат шуни таъкидлашим мумкинки, Эрон музокаралар жараёнига бегона масалаларни олиб киришга уринишда давом этар экан, келишувга эришиш учун зарур бўлган ҳаракатларни ё истамайди ёки қила олмайди», — деди АҚШ Давлат котиби, музокараларни қачон якунлаш мумкинлиги ҳақида берилган саволга.
Эрон ядровий дастури бўйича Қўшма кенг қамровли ҳаракатлар режаси 2015 йилда Эрон билан БМТ Хавфсизлик Кенгашининг доимий беш аъзоси ва Германия томонидан ядро инқирозини бартараф этиш мақсадида имзоланган. АҚШнинг аввалги президенти Дональд Трамп 2018 йилда ушбу келишувдан чиқишга қарор қилган эди. Американинг амалдаги раҳбари Жо Байден Вашингтонни Теҳрон ядровий келишувига қайтаришга тайёрлигини бир неча бор билдирган. Россия, Буюк Британия, Германия, Хитой, АҚШ ва Франция 2021 йилнинг апрель ойидан бери Венада Эрон билан ядровий келишувни асл кўринишида тиклаш бўйича музокаралар олиб бормоқда.
Изоҳ (0)