Buxoroda 2022-yilda o‘tgan yilga nisbatan jinoyatlar soni oshgani ma’lum qilindi

Buxoro viloyati Sudi raisi viloyatda 2022-yil oldingi yillarga nisbatan jinoyatlar soni oshganini ma’lum qildi. Bu haqda “Daryo” muxbiri xabar berdi.

Ta’kidlanishicha, Xalq deputatlari viloyat Kengashining oltmish uchinchi sessiyasida viloyat sudi raisi Laziz Qodirov 2022-yilning birinchi yarmida odil sudlovni amalga oshirish borasida sudlar tomonidan amalga oshirilgan ishlar haqida hisobot bergan.

“Viloyat sudlari tomonidan joriy yilning birinchi yarmida jami 1989 nafar shaxsga nisbatan 1571 ta jinoyat ishi ko‘rib chiqilgan. O‘tgan yilning birinchi yarmida esa 1312 nafar shaxsga nisbatan 1056 ta jinoyat ishi ko‘rib tamomlangan edi. Bu ko‘rsatkich jinoyatlar o‘tgan yilning shu davriga nisbatan 515 taga yoki 48,7 foizga oshganligini ko‘rsatadi”, — dedi viloyat sudi raisi.

Uning so‘ziga ko‘ra, viloyatda qasddan odam o‘ldirish 5 tadan 9 taga, qasddan badanga o‘rtacha og‘ir shikast yetkazish 40 tadan 63 taga, nomusga tegish 3 tadan 7 taga, o‘zlashtirish va rastrata yo‘li bilan talon-taroj qilish 71 tadan 114 taga, firibgarlik 211 tadan 302 taga, o‘g‘rilik 191 tadan 293 taga, pora berish 39 tadan 63 taga, bezorilik jinoyati 61 tadan 104 taga oshgan. Voyaga yetmagan shaxsni g‘ayriijtimoiy xatti-harakatlarga jalb qilish 7 tadan 5 taga, haqorat qilish 37 tadan 34 taga, tovlamachilik 9 tadan 6 taga, mehnatni muhofaza qilish qoidalarini buzish 8 tadan 6 taga kamaygan.

“Sudlanganlik ko‘rsatkichi ortgan, qasddan odam o‘ldirish, qasddan badanga o‘rtacha og‘ir shikast yetkazish, nomusga tegish, o‘g‘rilik, bezorilik jinoyatlarining sodir etilish sabablari tahlil qilindi, o‘rganildi. Avvalo, ota-onalar, keyin mahalla fuqarolar yig‘inlari va profilaktika inspektorlarining o‘zlariga yuklatilgan vazifalarni sidqidildan bajarmagani bois, ushbu jinoyatlar kelib chiqqan. Sayyor sudlar davomida ular o‘zlariga biriktirilgan hududdagi oilalarda yuzaga kelgan nosog‘lom vaziyatni sog‘lomlashtirish choralarini ko‘rishmagani, fuqarolar bilan huquqiy tarbiyaviy ishlar yetarli darajada olib borishmagani, ish bilan band bo‘lmagan fuqarolarni ish bilan ta’minlash maqsadida hech qanday amaliy ishlar qilinmagani oydinlashdi. Buning natijasida viloyatning turli manzillarida yangi jinoyatlar soni oshib ketgan”, — deydi Laziz Qodirov.

Bulardan tashqari, jinoyat sodir etgan 1451 nafar shaxsga nisbatan 1105 ta hukm chiqarilgan. Hukm chiqarilgan ishlar soni 45,9 foizga oshgan. 1571 ta jinoyat ishining 1275 tasi yoki 81,2 foizi bo‘yicha xususiy ajrimlar chiqarilgan.