“Ko‘pchilik o‘qituvchilar maktab direktoriga qarshi chiqolmaydi” — Andijonda o‘qituvchilar majburiy mehnatga jalb qilingani aytilmoqda

Andijon viloyatining Oltinko‘l tumanida joylashgan 2-umumiy o‘rta ta’lim maktabida majburiy mehnatga yo‘l qo‘yilgani aytilmoqda. “Daryo” tahririyatiga kelib tushgan ma’lumotlarga ko‘ra, o‘qituvchilar maktab ma’muriyati tomonidan 1—4-sentabr kunlari ta’mirlash ishlariga jalb qilingan.

Eslatib o‘tamiz, prezident farmoniga muvofiq, 1-sentabr (payshanba) — Mustaqillik bayrami kuni, 2-sentabr (juma) — qo‘shimcha dam olish kuni, 3-sentabr (shanba) — 6 kunlik ish haftasidagi xodimlar uchun qo‘shimcha dam olish kuni va 4-sentabr (yakshanba) — umumiy dam olish kuni deb belgilangan edi.

Maktabning bir nechta o‘qituvchisi “Daryo” muxbiri bilan suhbatda maktab ma’muriyati o‘quv yili boshida xonalarni darsga tayyorlash uchun muallimlarni chaqirib, ishlatganini tasdiqladi.

“Ko‘pchilik o‘qituvchilar maktab direktoriga qarshi chiqolmaydi. Agar kimdir aytganini qilmasa, uning dars soatini kamaytirishga, hujjatlaridan kamchilik topishga kirishib ketadi”, — dedi o‘qituvchilardan biri.

Yana bir o‘qituvchining guvohlik berishicha, u maktab direktorining noqonuniy talablarini bajarmagani bois uni ta’mirlash ishlariga chaqirmaydi.

“Menga ortiqcha ish buyurolmaydi. Aytsa ham, qilmayman. O‘quv yili boshlanishidan avval narsalarimni ko‘zdan kechirish uchun maktabga borganimda boshqa ustozlarning ishlayotganini ko‘rdim. Bunday holatlar maktabimizda ko‘p bo‘ladi”, — dedi maktab o‘qituvchisi.

Maktab o‘qituvchilari uchun ochilgan Telegram-kanalidan olingan skrinshotlarga ko‘ra, 1-sentabr — Mustaqillik bayrami kuni ham o‘qituvchilar chaqirib olingan.

O‘qituvchilar guruhida FNA nomli sahifa egasi “Mustaqillik kuni bilan hammani. Maktabga kelinglar endi”, degan yozuv qoldirilgan. Uning ostidan boshqa bir o‘qituvchi ta’mirlash jarayonidan rasm joylagan.

Maktab direktorining o‘rinbosari Sardorbek Usmonov 3-sentabr kuni guruhga o‘qituvchilar 4-sentabr — yakshanba kuni maktabga ishga chiqishlarni va bu direktor topshirig‘i ekanligini yozib qoldirgan.

“Hurmatli ustozlar, ertaga shanba kuni hamma dam oladi. Yakshanba kuni hamma ishga kelar ekan, direktor topshirig‘i”, deya xabar qoldirgan direktor o‘rinbosari.

“Daryo” muxbiri maktab direktori o‘rinbosari Sardorbek Usmonov bilan bog‘lanib, holatga izoh so‘raganida, u yakshanba kuni uyda boshqa yumush bilan band bo‘lganini aytgan.

O‘qituvchilar jamoasining Telegram-guruhida Dilorom nomli sahifa egasi (maktab direktori Dilorom Yo‘ldosheva) 4-sentabr kuni “Insoflaring yo‘q ekan. Ertaga birinchi kunligi eslaringdan chiqdi, shekilli”, deb yozgan.

Holatga izoh olish maqsadida “Daryo” muxbiri bir necha kun davomida maktab direktori Dilorom Yo‘ldoshevaga qo‘ng‘iroq qilgan, ammo u javob bermagan.

“Daryo” voqealar rivojini kuzatib boradi.