Angren truba zavodi — “Angren pipe plant” ustav kapitalidagi 100 foiz ulushni xususiylashtirish bo‘yicha professional konsalting kompaniyasi tanlab olinishi yuzasidan tanlov e’lon qilindi. Bu haqda Davlat aktivlarini boshqarish agentligi xabar berdi.
Mazkur tanlov jarayonida 5 ta professional konsalting kompaniyalardan takliflar qabul qilinib, ularning moliyaviy taklifi, sohadagi tajribasi, malakasi va belgilangan vazifalarni amalga oshirish bo‘yicha yondashuvlari asosida saralandi.
Saralash natijasida, Portfolio Investments kompaniyasi xususiylashtirish bo‘yicha konsultant sifatida tanlov g‘olibi deb topildi.
Portfolio Investments kompaniyasi O‘zbekistonda faoliyat yuritayotgan investitsion kompaniyasi bo‘lib, turli xizmatlar, jumladan, brokerlik, aktivni boshqarish va konsalting xizmatlarini davlat organlari, korporatsiyalar va moliyaviy institutlarga ko‘rsatadi.
Korxona haqida ma’lumot
“Angren pipe plant” — O‘zbekistonda turli diametrli mis quvurlar ishlab chiqaruvchi korxona bo‘lib, loyiha quvvati yiliga 8 ming tonnani tashkil etadi.
Asosiy xomashyo sifatida Markaziy Osiyo mintaqasidagi eng yirik tog‘-kon va qayta ishlash korxonalaridan biri bo‘lgan “Olmaliq KMK” tomonidan asosiy metall tarkibi 99,99 foiz bo‘lgan katodli mis yetkazib beriladi.
2021-yil yakuniga ko‘ra, korxona 606,8 mlrd so‘m sof tushum, 167,2 mlrd so‘m sof foyda olgan.
Avvalroq “Chinoz neftni qayta ishlash zavodi”ni xususiylashtirish jarayoni davom etayotgani haqida xabar berilgandi.
Izoh (0)