Ангрен труба заводи — «Angren pipe plant» устав капиталидаги 100 фоиз улушни хусусийлаштириш бўйича профессионал консалтинг компанияси танлаб олиниши юзасидан танлов эълон қилинди. Бу ҳақда Давлат активларини бошқариш агентлиги хабар берди.
Мазкур танлов жараёнида 5 та профессионал консалтинг компаниялардан таклифлар қабул қилиниб, уларнинг молиявий таклифи, соҳадаги тажрибаси, малакаси ва белгиланган вазифаларни амалга ошириш бўйича ёндашувлари асосида сараланди.
Саралаш натижасида, Portfolio Investments компанияси хусусийлаштириш бўйича консултант сифатида танлов ғолиби деб топилди.
Portfolio Investments компанияси Ўзбекистонда фаолият юритаётган инвестицион компанияси бўлиб, турли хизматлар, жумладан, брокерлик, активни бошқариш ва консалтинг хизматларини давлат органлари, корпорациялар ва молиявий институтларга кўрсатади.
Корхона ҳақида маълумот
«Angren pipe plant» — Ўзбекистонда турли диаметрли мис қувурлар ишлаб чиқарувчи корхона бўлиб, лойиҳа қуввати йилига 8 минг тоннани ташкил этади.
Асосий хом ашё сифатида Марказий Осиё минтақасидаги энг йирик тоғ-кон ва қайта ишлаш корхоналаридан бири бўлган «Олмалиқ КМК» томонидан асосий металл таркиби 99,99 фоиз бўлган катодли мис етказиб берилади.
2021 йил якунига кўра, корхона 606,8 млрд сўм соф тушум, 167,2 млрд сўм соф фойда олган.
Аввалроқ «Чиноз нефтни қайта ишлаш заводи»ни хусусийлаштириш жараёни давом этаётгани ҳақида хабар берилганди.
Изоҳ (0)