Ukrainadagi urush va Rossiyaga qarshi sanksiyalar natijasi: O‘zbekistonda xorijiy IT kompaniyalar soni keskin ko‘paydi

2022-yil yanvar—avgust holatiga ko‘ra O‘zbekistonda yangi tashkil etilgan chet el IT kompaniyalari soni 196 ta bo‘ldi. Bu haqda Davlat statistika qo‘mitasidan ma’lum bo‘ldi.

O‘tgan yilning shu davrida 64 ta chet el IT kompaniyalari tashkil qilingan edi.

2021-yil yanvar—avgust oylarida O‘zbekistonda 375 ta xorijiy IT kompaniyalar faoliyat ko‘rsatayotgan edi. Joriy yilda bu ko‘rsatkich 579 taga yetdi.

2022-yil avgust oyining o‘zida 26 ta yangi xorijiy IT kompaniyalari faoliyatini boshladi. Iyul oyida 20 ta, iyunda 30 ta shunday kompaniya tashkil qilingan.

Bunga nima sabab bo‘lmoqda?

Bunday o‘sish Ukrainada urush boshlanishi bilan ko‘plab Rossiya va Belarus IT kompaniyalarining boshqa davlatlarga, jumladan, O‘zbekistonga ko‘chib o‘tishga qaror qilgani bilan izohlanadi.

Bundan tashqari, 1-apreldan boshlab O‘zbekistonda TashRush dasturi ishga tushgan, uning doirasida IT Park xodimlari xorijiy IT kompaniyalarga o‘z bizneslarini O‘zbekistonga ko‘chirishda yordam bermoqda.

O‘zbekistonga ko‘chib kelgan IT kompaniyalari orasida quyidagilar bor:

• Ravenage Games — kompyuter o‘yinlari nashriyoti. Kompaniya moliyalashtirish bilan ham shug‘ullanadi va o‘tgan yili 20 mln dollarlik fond tashkil qildi.
• Outer Space — Made on Earth Games o‘yinlarini ishlab chiqarish studiyasi. Kompaniya hozir 4X mobil strategiyasining ustida ishlamoqda.
• Fusionlabs — loyiha menejerlari va dasturchilarni tayyorlaydigan ProductStar kompaniyasi.
• ForCode — Diglex (matndan ma’lumot olish vositasi) va Robert Robot (texnik yordam xizmatlari uchun sun’iy intellekt) ishlab chiqaruvchisi.
• TopFactor — kompaniya xodimlarning ish faoliyatini boshqarishning avtomatlashtirilgan tizimlarini joriy etish bilan shug‘ullanadi.
• Okay QA — dasturiy ta’minotni sinovdan o‘tkazish va sifat nazorati kompaniyasi.

TashRush dasturi chet el IT kompaniyalarini jalb qilish uchun ishlab chiqilgan va Tashkent Rush, ya’ni “Toshkent vasvasasi” degan qiyosiy nom tanlangan.

Bu o‘z vaqtida Kaliforniyada yuz bergan “Oltin vasvasasi”ni eslatadi. O‘sha vaqtda Kaliforniyada oltin koni topilgani haqida shov-shuv tarqalib, hamma u yerga oshiqa boshlagan bo‘lsa, hozir Toshkent ko‘plab IT-mutaxassislar talpinadigan makonga aylandi.

Dasturning asosiy maqsadi — xorijiy kompaniyalar o‘z jamoasini O‘zbekistonga relokatsiya qilishida ko‘maklashishdir. Ushbu loyiha bir necha bepul yordamlarni o‘z ichiga oladi.

Xususan, mutaxassislarni aeroportda kutib olib, hamyonbop turar joy topishigacha yordam berish ham uning ichiga kiritilgan.