Ijtimoiy tarmoqlarda Qashqadaryoda bog‘cha tarbiyalanuvchisi bo‘lgan 4 yoshli bolani “Afrosiyob” tezyurar poyezdi urib ketgani haqidagi xabar va holat aks etgan videolar tarqaldi. Viloyat maktabgacha ta’lim boshqarmasi holat haqida rasmiy ma’lumot berdi.
Unda aytilishicha, voqea 2022-yil 9-sentabr kuni soat 15:33 da Koson tumani, “Qo‘ng‘irtog‘” MFY, Kamandi qishlog‘ida Qarshi—Maroqand temiryo‘l yo‘nalishida qatnovchi “Afrosiyob” yuqori tezyurar elektropoyezdi bilan sodir bo‘lgan.
Mazkur mahallada yashovchi, 2019-yilda tug‘ilgan A.T. 8-sentabr kuni hududdagi oilaviy nodavlat maktabgacha ta’lim tashkilotiga olib kelingan. Voqea sodir bo‘lgan kuni A.T. ikkinchi kuni bog‘chaga kelishi bo‘lgan, uning hali yo‘llanmasi bo‘lmagan. Kunning ikkinchi yarmida A.T. nazoratsiz qoldirilishi natijasida bog‘cha hududidan chiqib, yaqin oradagi temiryo‘lga borib qolgan.
Poyezd yo‘liga chiqvolib ketayotganida “Afrosiyob” yuqori tezyurar elektropoyezdi uni urib ketgan. Olingan jarohatlar oqibatida bola vafot etgan.
“Viloyat maktabgacha ta’lim boshqarmasi hamda Koson tuman maktabgacha ta’lim bo‘limi tomonidan o‘z vaqtida barcha turdagi maktabgacha ta’lim tashkilotlari mas’ullariga texnika va xavfsizlik qoidalariga rioya etilishi borasida ko‘rsatmalar berilgan. Ayni paytda holat yuzasidan viloyat maktabgacha ta’lim boshqarmasi ishchi guruhi hamda huquqni muhofaza qiluvchi organlar tomonidan surishtiruv ishlari olib borilmoqda”, — deyiladi Qashqadaryo MTB xabarida.
IIV Transport va turizm obyektlarida xavfsizlikni ta’minlash departamenti holat yuzasidan Qarshi transport prokuraturasi tomonidan tergovga qadar tekshiruv harakatlari olib borilayotganini ma’lum qildi.
Mavzuga doir: Farg‘onadagi bog‘chadan tashqariga ruxsatsiz chiqqan 4 yoshli bola cho‘kib ketib, vafot etdi
Izoh (0)