Yakuniga yetayotgan hafta ham shov-shuvlarga boy haftalardan biri bo‘ldi. Dastlab yangi o‘quv yili va uning kitoblar ijarasi bilan bog‘liq mashmashasi jamoatchilik e’tiborini tortgan bo‘lsa, turar joy topolmayotgan talabalar dodi hatto vazirlar va rektorlarni ham “tilga kiritdi”. Hafta yakunida esa qashqadaryolik prokuror OAVda chiqqan xabarlarni o‘chirtirishga urinishi bilan ijtimoiy tarmoq vakillari e’tiboriga tushdi. “Daryo” doimgidek hafta yakunida haftaning eng shov-shuvli voqealari ketma-ketligini eslashda davom etadi.
Hafta avvalida hududlardagi umumta’lim maktablarida birinchi qo‘ng‘iroq sadolari yangradi. Mazkur tadbirlarda ishtirok qilgan rahbarlar, jumladan Samarqand viloyati hokimi uzoq masofaga qatnab o‘qiyotgan o‘quvchilar mushkulini oson qilib, ularga avtobus sovg‘a qildi. Andijon viloyati hokimi Shuhratbek Abdurahmonov esa tadbir davomida viloyat televideniyesida onlayn chiqish qilib, barcha o‘qituvchilar va o‘quvchilarni yangi o‘quv yili bilan qutladi. Qashqadaryo viloyati hokimi Murodjon Azimov esa jadidlarning so‘nggi vakili xonadonida uy muzey ochdi.
Hafta boshida boshlangan yana bir mashmasha — maktab darsliklari ijrasining keskin oshishi prezident Shavkat Mirziyoyevning e’tibori va topshirig‘i sabab bepul bo‘ladigan bo‘ldi. Ko‘p o‘tmay prezident adminstratsiyasi maktab darsliklari chop etilishida korrupsion holatlarga yo‘l qo‘ymaslik borasida harakat boshlanganini, maktab darsliklari to‘liq tekshirilishini bildirdi.
Maktab darsliklarining bepul bo‘lishi haqidagi voqealar fonida samarqandlik o‘qituvchi o‘quvchilariga darsliklarni otib tarqatib, jamoatchilik tiliga tushdi. Voqeaga e’tibor qaratgan mas’ullar nafaqat bu o‘qituvchini, shu maktab direktorini ham ishdan oldi.
Ushbu haftada shuningdek, maktab o‘quvchisi va bog‘cha bolasining suvga cho‘kib, vafot etish holati sodir bo‘ldi. Namangan viloyatida tengdoshlari bilan cho‘milishga borgan 12 yoshli qiz suvga cho‘kib, 25 kundan beri topilmayotgani ma’lum bo‘lgan bo‘lsa, Farg‘onada 4 yoshli bog‘cha bolasi uyi yonidagi soyga sirpanib, tushib ketgach, uch soatdan so‘ng jasadi topilgan.
Yakunlanayotgan hafta Toshkentda talabalarning turar joy bilan bog‘liq muammolarga duch kelishi bilan ham yoddan qoldi. OTMlarda o‘qishni boshlagan talabalar yotoqxonalarida joy yetishmasligi sabab poytaxtdan ijara uylar izlashga tushdi.
Ko‘pchiligi narx borasida muammoga duch kelgach, turar joy masalasida dolzarb masala sifatida kun tartibiga chiqdi. Shundan so‘ng O‘zJOKU rektori Sherzodjon Qudratxo‘ja toshkentliklarga murojaat qilib, bo‘sh uylari bo‘lsa talabalarni ijaraga qo‘yishlarini iltimos qildi. Shundan so‘ng OAV vakillari bilan yuzma-yuz kelgan Oliy va o‘rta maxsus ta’lim vaziri Abduqodir Toshqulov talabalar orasida yotoqxonaga ehtiyoji bor talabalar 211 ming kishini tashkil qilishini, shulardan 91 ming talabaga yotoqxonalardan joy qilib berilganini ochiqladi. Va talablarni ijara uylarga joylashtirish harakatlari davom etayotganini, bu borada ularga yengilliklar berilishini ma’lum qildi.
O‘tayotgan hafta, shuningdek, Surxondaryo hokimi To‘ra Bobolovning kimlarnidir bo‘ralatib so‘kkani-yu, Qoraqalpog‘iston Respublikasi yangi rahbarining mas’ullarni tanqid qilib, jamoatchilikka tez-tez ko‘rinishi berishi, qolaversa, qoraqalpoq qizlarining janjali-yu, ombudusmanning Nukus voqealarining asosiy aybdorlaridan biri Dauletmurat Tajimuratov holidan xabar olishi bilan esda qoldi.
“Daryo” o‘quvchilariga qaynoq yangiliklarni ulashishda davom etadi.
Izoh (0)