Якунига етаётган ҳафта ҳам шов-шувларга бой ҳафталардан бири бўлди. Дастлаб янги ўқув йили ва унинг китоблар ижараси билан боғлиқ машмашаси жамоатчилик эътиборини тортган бўлса, турар жой тополмаётган талабалар доди ҳатто вазирлар ва ректорларни ҳам «тилга киритди». Ҳафта якунида эса қашқадарёлик прокурор ОАВда чиққан хабарларни ўчиртиришга уриниши билан ижтимоий тармоқ вакиллари эътиборига тушди. «Дарё» доимгидек ҳафта якунида ҳафтанинг энг шов-шувли воқеалари кетма-кетлигини эслашда давом этади.
Ҳафта аввалида ҳудудлардаги умумтаълим мактабларида биринчи қўнғироқ садолари янгради. Мазкур тадбирларда иштирок қилган раҳбарлар, жумладан Самарқанд вилояти ҳокими узоқ масофага қатнаб ўқиётган ўқувчилар мушкулини осон қилиб, уларга автобус совға қилди. Андижон вилояти ҳокими Шуҳратбек Абдураҳмонов эса тадбир давомида вилоят телевидениесида онлайн чиқиш қилиб, барча ўқитувчилар ва ўқувчиларни янги ўқув йили билан қутлади. Қашқадарё вилояти ҳокими Муроджон Азимов эса жадидларнинг сўнгги вакили хонадонида уй музей очди.
Ҳафта бошида бошланган яна бир машмаша — мактаб дарсликлари ижрасининг кескин ошиши президент Шавкат Мирзиёевнинг эътибори ва топшириғи сабаб бепул бўладиган бўлди. Кўп ўтмай президент админстрацияси мактаб дарсликлари чоп этилишида коррупцион ҳолатларга йўл қўймаслик борасида ҳаракат бошланганини, мактаб дарсликлари тўлиқ текширилишини билдирди.
Мактаб дарсликларининг бепул бўлиши ҳақидаги воқеалар фонида самарқандлик ўқитувчи ўқувчиларига дарсликларни отиб тарқатиб, жамоатчилик тилига тушди. Воқеага эътибор қаратган масъуллар нафақат бу ўқитувчини, шу мактаб директорини ҳам ишдан олди.
Ушбу ҳафтада шунингдек, мактаб ўқувчиси ва боғча боласининг сувга чўкиб, вафот этиш ҳолати содир бўлди. Наманган вилоятида тенгдошлари билан чўмилишга борган 12 ёшли қиз сувга чўкиб, 25 кундан бери топилмаётгани маълум бўлган бўлса, Фарғонада 4 ёшли боғча боласи уйи ёнидаги сойга сирпаниб, тушиб кетгач, уч соатдан сўнг жасади топилган.
Якунланаётган ҳафта Тошкентда талабаларнинг турар жой билан боғлиқ муаммоларга дуч келиши билан ҳам ёддан қолди. ОТМларда ўқишни бошлаган талабалар ётоқхоналарида жой етишмаслиги сабаб пойтахтдан ижара уйлар излашга тушди.
Кўпчилиги нарх борасида муаммога дуч келгач, турар жой масаласида долзарб масала сифатида кун тартибига чиқди. Шундан сўнг ЎзЖОКУ ректори Шерзоджон Қудратхўжа тошкентликларга мурожаат қилиб, бўш уйлари бўлса талабаларни ижарага қўйишларини илтимос қилди. Шундан сўнг ОАВ вакиллари билан юзма-юз келган Олий ва ўрта махсус таълим вазири Абдуқодир Тошқулов талабалар орасида ётоқхонага эҳтиёжи бор талабалар 211 минг кишини ташкил қилишини, шулардан 91 минг талабага ётоқхоналардан жой қилиб берилганини очиқлади. Ва талабларни ижара уйларга жойлаштириш ҳаракатлари давом этаётганини, бу борада уларга енгилликлар берилишини маълум қилди.
Ўтаётган ҳафта, шунингдек, Сурхондарё ҳокими Тўра Боболовнинг кимларнидир бўралатиб сўккани-ю, Қорақалпоғистон Республикаси янги раҳбарининг масъулларни танқид қилиб, жамоатчиликка тез-тез кўриниши бериши, қолаверса, қорақалпоқ қизларининг жанжали-ю, омбудусманнинг Нукус воқеаларининг асосий айбдорларидан бири Даулетмурат Тажимуратов ҳолидан хабар олиши билан эсда қолди.
«Дарё» ўқувчиларига қайноқ янгиликларни улашишда давом этади.
Изоҳ (0)