Ijtimoiy tarmoqlarda Toshkent shahridagi ko‘p qavatli uylarni qurish uchun sifatsiz g‘isht mahsuloti olib kelingani haqida videolavha tarqaldi. Videoda pishgan g‘isht mahsuloti yaroqsizligi aytilgan.
“Loydek maydalanib ketyapti. Istalganini olib ko‘ring, ikkiga emas, titilib, mayda bo‘lib ketyapti. Qo‘l bilan ushlab silkitilsa, titilib ketyapti”, — deydi video muallifi.
Holat yuzasidan Qurilish vazirligi matbuot xizmati izoh berdi.
“Toshkent shahar Yashnobod tumani O‘sh ko‘chasida joylashgan ko‘p qavatli turar joy binolarining qurilishi Vazirlar Mahkamasining ‘Qurilish sohasiga oid yagona ma’muriy qurilish reglamentlarini tasdiqlash to‘g‘risida’gi qarori bandlariga zid ravishda Toshkent shahar Qurilish sohasida hududiy nazorat inspeksiyani xabardor qilmagan holda amalga oshirilgan”, – deyiladi vazirlik axborotida. Lekin mas’ul idora qurilish ishlari reglamentning aynan qaysi bandlariga zid olib borilganiga aniqlik kiritmagan.
Ta’kidlanishicha, qurilish firmasiga inspeksiya tomonidan Ma’muriy Javobgarlik to‘g‘risidagi Kodeksining 99-moddasi 7-qismi (Shaharsozlik to‘g‘risidagi qonunchilikka muvofiq binolarni, inshootlarni yoki boshqa obyektlarni qurishga, rekonstruksiya qilishga va kapital ta’mirlashga taqiqlar (cheklovlar) belgilangan zonalarda shunday ishlarni amalga oshirish — fuqarolarga bazaviy hisoblash miqdorining ellik baravaridan yetmish baravarigacha, mansabdor shaxslarga esa — yetmish baravaridan yuz baravarigacha miqdorda jarima solishga sabab bo‘ladi) bilan chora ko‘rilgan.
Mazkur qurilish obyektida 2022-yilning avgust oyi oxirlarida “Ohangaron sof g‘ishtlari” MCHJ tomonidan olib kelingan g‘isht mahsuloti sifatsiz ekanligi aniqlangan. Qurilish ishlariga yaroqsiz bo‘lganligi uchun g‘ishtdan foydalanilmagan.
Vazirlikning qo‘shimcha qilishicha, hozirgi kunda Toshkent shahar Qurilish sohasida hududiy nazorat inspeksiyasi tomonidan “Ohangaron sof g‘ishtlari” MCHJ korxonasiga nisbatan chora ko‘rilmoqda.
Izoh (0)