Toshkentning Chilonzor tumanida Dream House Stroy MCHJ tomonidan 58 tup har xil turdagi manzarali daraxtlar noqonuniy kesib tashlangani aniqlangandi. Bosh prokuratura matbuot kotibi holat yuzasidan jinoyat ishi qo‘zg‘atilganini ma’lum qildi.
Kompaniya daraxtlarni kesmaslik haqida kafolat xati taqdim etgan, Ekologiya boshqarmasi tomonidan daraxtlar kesilishiga rad javobi berilganiga qaramay, ularni kesib tashlagandi. Buning oqibatida tabiatga 797,7 million so‘m miqdorda zarar yetkazilgan.
O‘tkazilgan tekshirish natijasiga ko‘ra, quruvchi tashkilot mansabdor shaxslariga nisbatan Jinoyat kodeksining 198-moddasi 3-qismi (ekinzorlarni, o‘rmonlarni, daraxtlarni yoki boshqa o‘simliklarni shikastlantirish yoxud nobud qilish) bilan jinoyat ishi qo‘zg‘atilgan. Tergov harakatlari olib borilmoqda.
Eslatib o‘tamiz, avgust oyining boshlarida Chilonzorda yo‘l kengaytirish ishlarida 101 tup daraxt ildizi shikastlanib, o‘simlik dunyosiga 420 million 450 ming so‘m miqdorida zarar yetkazilgandi. Buning ortidan Chilonzor tumani hokimi Shavkat Mavlonov va prokurori Izzatilla Bozorov lavozimidan ozod etilgandi.
Mavzuga doir: Toshkentda qurilish ishlari jarayonida 12 tup daraxtga shikast yetkazilgani aniqlandi
Izoh (0)