Уруш бошланганидан буён Россия ёнилғи экспортидан қарийб 160 млрд евро орттирган. Унинг ярмидан кўпини Евроиттифоққа сотган

24 февралдан 24 августгача Россия қазилма ёнилғи экспортидан қарийб 158 миллиард евро даромад олган, деб ёзади Meduza. 6 сентябрь ҳолатига Евроиттифоқ мамлакатлари Россия ёнилғисини сотиб олишга 87,5 миллиарддан ортиқ маблағ сарф қилган. Бу ҳақда CREA (Энергия ва тоза ҳаво тадқиқотлари маркази) мустақил халқаро ташкилоти маълум қилди.

Ташкилот маълумотларига кўра, Россия қазилма ёнилғисининг бошқа энг йирик импортчилари Хитой (34,9 миллиард евро), Туркия (10,7 миллиард евро), Ҳиндистон (6,6 миллиард евро), Япония (2,5 миллиард евро), Миср (2,3 миллиард евро) ва Жанубий Корея (2 миллиард евро) ҳисобланади.

CREA етказиб бериш ҳажмлари камайганига қарамасдан, Россия талафотларни қазилма ёнилғининг ошган нархлари ҳисобига қоплаётганига эътибор қаратди, бунинг шарофати билан мамлакатнинг жорий даромадлари аввалги йилларникидан анча юқоридир.

Шу билан бирга, деб қайд этади Bloomberg Россия ҳукуматининг ёпиқ маърузасига таяниб, Европага газ етказиб бериш ҳажмининг қисқаргани Россияга кунига бир миллиард рублга тушмоқда, унинг бутунлай тўхтатилиши эса бюджетга йилига 400 миллиард олинмай қолган солиқ тушумларига тенг бўлиши мумкин. Бундан ташқари, маърузада айтилишича, Евроиттифоқнинг Россия нефти ва газидан кескин воз кечиши Россиянинг ўз бозорини таъминлаш қобилиятига зарба бериши мумкин.

Сентябрь бошида «Катта еттилик» мамлакатлари Россия нефтининг нарх чегарасига нисбатан келишувга эришган эди. Шу билан тахминан бир вақтда Еврокомиссия раҳбари Урсула фон дер Ляйен Россия газига нисбатан нархнинг энг юқори нуқтасини жорий этиш режаси ҳақида эълон қилди.

6 сентябрь куни Еврокомиссия томонидан таклиф этилаётган чекловларнинг иккита варианти маълум бўлди. Биринчи вариант Россия гази учун нархнинг энг юқори нуқтасини бутун Евроиттифоқ ҳудудида жорий қилишни кўзда тутади, иккинчи вариант эса Евроиттифоққа аъзо мамлакатларни «қизил» (чеклов амал қиладиган) ва «яшил» (нархлар «анча баланд» бўлиб қоладиган) зоналарга бўлишни назарда тутади.

Санкцияларнинг олтинчи пакети доирасида Евроиттифоқ Россия нефти ва нефть маҳсулотларидан босқичма-босқич воз кечиш режасини келишиб олганди. Шу билан бирга, чекловлар нефтни қувурлар орқали етказиб бериш учун амал қилмайди.