Toshkent viloyati hokimi Zoir Mirzayev boshchiligidagi delegatsiya amaliy tashrif bilan Koreya Respublikasida bo‘lib turibdi, deb xabar bermoqda Dunyo axborot agentligi.
Qayd etilishicha, viloyat hokimi 5-avgust kuni “Janubiy Koreya–Markaziy Osiyo” hamkorlik forumi kotibiyati ijrochi direktori Li Chong Guk bilan uchrashuv o‘tkazgan. Muloqot davomida ikki mamlakat o‘rtasidagi munosabatlarning hozirgi kundagi darajasiga yuqori baho berilgan.
Jumladan, Li Chong Guk O‘zbekiston Janubiy Koreya uchun mintaqadagi eng muhim strategik hamkor ekanini ta’kidlab, so‘nggi yillarda ikki mamlakat rahbarlari o‘rtasidagi yaqin munosabatlar davlatlar o‘rtasidagi aloqalarning rivojlanishiga turtki bo‘layotganini qayd etgan.
Uchrashuvda tomonlar transport-logistika, qishloq xo‘jaligi, sanoat zonalari, sog‘liqni saqlash va boshqa sohalarda yangi loyihalarni amalga oshirish va mavjud loyihalarni tizimli davom ettirishga kelishib olgan. Janubiy Koreya vakillari hozirda O‘zbekistonda dorivor o‘simliklar, tibbiyot, baliqchilik va sanoatni rivojlantirish sohalarida loyihalar amalga oshirayotgani haqida ma’lumot berilgan.
Tomonlar hamkorlikni davom ettirish va yangi loyihalarni amalga oshirish yo‘llarini birgalikda ko‘rib chiqishga tayyorligini bildirgan.
Izoh (0)