Тошкент вилояти ҳокими Зоир Мирзаев бошчилигидаги делегация амалий ташриф билан Корея Республикасида бўлиб турибди, деб хабар бермоқда Дунё ахборот агентлиги.
Қайд этилишича, вилоят ҳокими 5 август куни «Жанубий Корея–Марказий Осиё» ҳамкорлик форуми котибияти ижрочи директори Ли Чонг Гук билан учрашув ўтказган. Мулоқот давомида икки мамлакат ўртасидаги муносабатларнинг ҳозирги кундаги даражасига юқори баҳо берилган.
Жумладан, Ли Чонг Гук Ўзбекистон Жанубий Корея учун минтақадаги энг муҳим стратегик ҳамкор эканини таъкидлаб, сўнгги йилларда икки мамлакат раҳбарлари ўртасидаги яқин муносабатлар давлатлар ўртасидаги алоқаларнинг ривожланишига туртки бўлаётганини қайд этган.
Учрашувда томонлар транспорт-логистика, қишлоқ хўжалиги, саноат зоналари, соғлиқни сақлаш ва бошқа соҳаларда янги лойиҳаларни амалга ошириш ва мавжуд лойиҳаларни тизимли давом эттиришга келишиб олган. Жанубий Корея вакиллари ҳозирда Ўзбекистонда доривор ўсимликлар, тиббиёт, балиқчилик ва саноатни ривожлантириш соҳаларида лойиҳалар амалга ошираётгани ҳақида маълумот берилган.
Томонлар ҳамкорликни давом эттириш ва янги лойиҳаларни амалга ошириш йўлларини биргаликда кўриб чиқишга тайёрлигини билдирган.
Изоҳ (0)