Samarqand viloyatida aliment to‘lashdan qasddan bo‘yin tovlab kelgan 77 nafar qarzdor ota jinoiy, 521 nafari esa ma’muriy javobgarlikka tortildi. Bu haqda Xalq deputatlari viloyat kengashining navbatdagi sessiyasida MIBning viloyat boshqarmasi boshlig‘i Mehroj Nasrullayev xabar berdi.
Sessiyada ta’kidlanishicha, 2022-yilning olti oyi davomida majburiy ijro tadbirlari natijasida Samarqand viloyatida aliment to‘lovchi qarzdorlardan jami 59,5 milliard so‘mdan ortiq aliment pullari undirilgan.
“2022-yilning 1-iyul holatiga ko‘ra viloyat bo‘yicha aliment to‘lovlarini undirish bilan bog‘liq ijro hujjatlari 34 ming 508 taga yetgan. Bu MIB viloyat boshqarmasi ish yurituvidagi ijro ishlarining 28,3 foizini, ya’ni qariyb uchdan bir qismini tashkil qiladi. 2022-yilning olti oyida 2021-yilning mos davriga nisbatan qarzdorlardan 32,4 milliard so‘m ko‘p aliment pullari undirilgan. Aliment to‘lovlarini to‘lashdan muntazam ravishda bo‘yin tovlab kelgan jami 521 nafar qarzdor Ma’muriy javobgarlik to‘g‘risidagi kodeksining 474-moddasi bilan ma’muriy javobgarlikka, 77 nafari esa Jinoyat kodeksining 122-moddasi bilan jinoiy javobgarlikka tortilgan”, — deydi Mehroj Nasrullayev.
Qayd etilishicha, viloyat bo‘yicha aliment oluvchilar nomiga shaxsiy bank plastik kartalari ochilib, 6 oy davomida 45,4 milliard so‘mdan ortiq aliment pullari ularning plastik kartalariga o‘tkazib berilgan.
Izoh (0)