Oliy va o‘rta maxsus ta’lim vazirligi huzuridagi markaz mas’ullari tomonidan Toshkent shahrida 50 nafarga yaqin talaba ijara uylariga joylashtirildi.
Ta’kidlanishicha, ijaraga uy qidirib yurgan talabalarning muammolarini o‘rganish va yaqindan yordam berish maqsadida vazirlik huzuridagi Talaba va o‘quvchilarning ma’naviy yuksalishiga ko‘maklashish markazi xodimlari Toshkent shahri Chilonzor tumanida joylashgan “uy bozori”da bo‘ldi.
Bunda talabalarning turar joy bo‘yicha muammolari o‘rganildi. Natijada O‘zbekiston milliy universiteti, Toshkent davlat sharqshunoslik universiteti, Toshkent moliya instituti, Toshkent tibbiyot akademiyasi, O‘zbekiston davlat san’at va madaniyat instituti, Toshkent davlat texnika universiteti, O‘zbekiston davlat jahon tillari universiteti, Toshkent davlat transport universiteti, Toshkent davlat pedagogika universiteti va yana bir qancha oliy ta’lim muassasalari talabalarining 50 ga yaqini qulay ijara uylariga joylashtirildi.
Shu o‘rinda, ijaraga turar joy izlab yurgan barcha talabalar o‘z tyutorlariga murojaat qilishlarini va ular bu masala bo‘yicha amaliy yordam berishlarini eslatib o‘tamiz.
O‘z ishiga mas’uliyatsizlik bilan yondashish holatlari kuzatilganda, @manaviyatedubot orqali murojaat qilishingiz mumkin.
“Alohida qayd etamizki, ushbu tadbirlar talabalar to‘liq turar joy bilan ta’minlangunga qadar doimiy vazirlik nazoratida bo‘ladi”, — deyiladi xabarda.
Izoh (0)