Farg‘ona viloyatidagi “Farg‘ona” chegara bojxona postida yarim kilogrammdan ziyod tillani yashirib olib o‘tishga uringan shaxs to‘xtatib qolindi. Bu haqda viloyat bojxona boshqarmasi xabar bermoqda.
“Farg‘ona” chegara bojxona posti orqali qo‘shni davlatdan O‘zbekistonga o‘tish maqsadida harakatlanayotgan fuqaro N.N. post “kirish” piyodalar zalining “yashil” yo‘lagidan harakatlanayotgan vaqtida xodimlarda shubha uyg‘otgani sababli to‘xtatilib, “qizil” yo‘lakka yo‘naltirildi. Shundan so‘ng unga tegishli bo‘lgan qo‘l yuklari bojxona nazoratidan o‘tkazildi.
Natijada fuqaroga tegishli bo‘lgan sumka ichida metalldan yasalgan zargarlik buyumlariga o‘xshash tovarlar borligi aniqlandi. Ko‘zdan kechirish davomida mazkur tovarlar bojxona xodimining og‘zaki so‘rovida ma’lum qilinmagan, umumiy qiymati 233 million so‘mlik 518 grammga teng bo‘lgan 49 turdagi zargarlik buyumlari ekani ma’lum bo‘ldi.
Mazkur holat yuzasidan jinoyat ishi qo‘zg‘atilib tergov harakatlari olib borilmoqda.
Izoh (0)