Davlat xaridlariga oid tartib-taomillar buzilgani yuzasidan Namangan viloyati hokimligiga taqdimnoma kiritildi. Bu haqda Korrupsiyaga qarshi kurashish agentligi axborot xizmati xabar berdi.
Namangan viloyatidagi noqonuniy qurilayotgan davlat buyurtmalari yuzasidan e’lon qilingan holat agentlik tomonidan o‘rganilgan. Aniqlanishicha, viloyat hokimligi Yagona buyurtmachi xizmati injiniring kompaniyasi buyurtmachiligida 2021-yil 26-mart kuni tender.mc.uz platformasi orqali viloyat teleradiokompaniyasi uchun yangi bino va yordamchi xonalar qurish bo‘yicha tender o‘tkazilgan. Xarid komissiyasi yig‘ilishining 2021-yil 26-apreldagi bayonnomasi bilan ushbu tenderda “Uychi Mega Stroy” MCHJ g‘olib deb topilgan.
Pudratchi tomonidan loyiha-smeta hujjatlari va shartnomada ko‘rsatilgan ishlar to‘liq bajarilib, Namangan shahri hokimining 2021-yil 30-dekabrdagi qaroriga asosan obyekt foydalanishga topshirilgan. Viloyat hokimligi tomonidan taqdim qilingan ma’lumotga ko‘ra, 2022-yilning avgust oyida viloyat teleradiokompaniyasi hududida qurilish-ta’mirlash ishlari emas, balki maxsus texnika jalb qilingan holda oyna tozalash va obodonlashtirish tadbirlari amalga oshirilgan.
Shuningdek, mazkur obyektda 2-navbat qurilish ta’mirlash ishlarini boshlash uchun 2022-yil 16-avgustda Namangan viloyat teleradiokompaniyasining mavjud bino va inshootlarini mukammal ta’mirlash obyekti bo‘yicha loyiha-smeta hujjatlarini tayyorlash yuzasidan davlat xaridlari elektron tizimi operatori orqali e’lon berilgan bo‘lib, viloyat hokimligi Yagona buyurtmachi xizmati injiniring kompaniyasi xarid komissiyasining 2022-yil 24-avgust kungi bayonnomasiga ko‘ra “Ziyoli loyiha” xususiy korxonasi ushbu tanlash g‘olibi deb topilgan.
Bundan tashqari, o‘rganish mobaynida buyurtmachi tomonidan 2 qavatli radiouzel binosining tom qismini mukammal ta’mirlash ishlari loyiha-smeta hujjatlarida nazarda tutilmagan va shartnomada ko‘rsatilmagan bo‘lsa-da, “Uychi Mega Stroy” MCHJga topshirilgani hamda bu bilan “Davlat xaridlari to‘g‘risida”gi qonun talablari buzilgani aniqlanib, Namangan viloyat hokimligiga taqdimnoma kiritildi.
Xabarda keltirilgan ma’lumotlarni o‘rganish hamda yuqorida keltirilgan holatlarga huquqiy baho berish uchun to‘plangan hujjatlar Bosh prokuraturaga yuborildi.
Izoh (0)