Xitoyning Sichuan muzofotida kuchli zilzila oqibatida ko‘plab odam nobud bo‘lgani va og‘ir jarohat olgani munosabati bilan Shavkat Mirziyoyev Xitoy raisi Si Szinpinga hamdardlik yo‘lladi. Bu haqda prezident matbuot kotibi xabar berdi.
Butun Xitoy xalqiga chuqur ta’ziya izhor etib, davlat rahbari halok bo‘lganlarning oila a’zolari va yaqinlariga hamdardlik bildirdi, jabrlanganlar shifo topishini tiladi.
Ma’lumot uchun, Xitoy seysmologik tarmoqlar markazi ma’lumotlariga ko‘ra, dushanba (5-sentabr) kuni mamlakatning Sichuan provinsiyasida sodir bo‘lgan 6,8 magnitudali zilzila oqibatida hozirgacha kamida 65 kishi halok bo‘lgan.
Ma’lum bo‘lishicha, Ganzi-Tibet avtonom viloyatida 37 kishi, Yaan shahridagi Shimian okrugida 28 kishi halok bo‘lgan. Qutqaruvchilar seshanba (6-sentabr) kuni zarar ko‘rgan hududlarning ayrim qismlarida bedarak yo‘qolganlarni qidirish ishlarini olib borgan. Shuningdek, ular omon qolganlarni zambilda daryo bo‘ylab vaqtincha qurilgan ko‘prik, shikastlangan bino va yo‘llardan olib o‘tishiga to‘g‘ri kelgan.
Luding okrugining ba’zi qismlarida ko‘chkilar sodir bo‘lishi natijasida esa daryolarning qo‘shilgan qismida to‘g‘onlangan ko‘llar paydo bo‘ldi. Zilzila o‘chog‘iga yaqin bo‘lgan mahalliy qishloqlarda minglab aholi qamalib qolgan. Biroq o‘t o‘chiruvchilar rezina qayiqlar va qutqaruv uskunalarini jabrlangan qishloqlarga olib kirib, ularni olib ketishga muvaffaq bo‘lgan.
Ba’zi yo‘llar va uylar ko‘chkidan jiddiy zarar ko‘rgan. Tasvirlarda binolar g‘isht uyumlari va yog‘och to‘sinlarga qulaganini ko‘rish mumkin. Mahalliy qishloq aholisi ixtiyoriy ravishda o‘t o‘chiruvchilarga ovqat yetkazib berish uchun taxminan besh kilometr tog‘li yo‘llarni bosib o‘tgan. Shuningdek, ular qutqaruvchilarga ho‘l kiyimlarni olov bilan quritishga yordam berib, qutqaruvchilarga o‘zlarining ko‘rpalarini bergan.
Seshanba (6-sentabr) kuni ertalab soat 07:00 holatiga ko‘ra, Ganzi-Tibet avtonom viloyatida 12 kishi bedarak yo‘qolgan. 170 dan ortiq kishi, jumladan, 56 nafari og‘ir jarohatlangan. Soat 05:50 holatiga ko‘ra, Shimian okrugida jami yaralanganlar soni 78 kishini tashkil etmoqda. Hozirda Sichuan provinsiyasi zilzila munosabati bilan favqulodda vaziyatlarda eng yuqori darajadagi rejimni e’lon qildi.
Izoh (0)