Saudiyaliklar uchun O‘zbekistonga kirish vizasi bekor qilinadi

Vizaning bekor qilinishi, Saudiya va O‘zbekistonning iqtisodiyot, turizm kabi yo‘nalishlarda o‘zaro aloqalarini mustahkamlashda yordam beradi. Bu haqda Shavkat Mirziyoyevning Saudiya Arabistoniga tashrifi yuzasidan 6-sentabr kuni Toshkent shahrida Saudiya elchisi Yusuf al-Utaybiy bilan bo‘lib o‘tgan brifingda ma’lum bo‘ldi, deb xabar bermoqda “Daryo” muxbiri.

Saudiya elchisi Yusuf al-Utaybiyga ko‘ra, bu saudiyalik sayohatchilarga oila a’zolari bilan O‘zbekistonga kelishi, uning tarixiy, islomiy va madaniy obidalari bilan tanishish imkoniyatini yaratib beradi.

“2023-yilning yanvar oyidan saudiyaliklar uchun O‘zbekistonga kirish vizasi bekor qilinadi. Saudiya Arabistoni Turizm vazirligi tomonidan ham o‘nlab mamlakatlar uchun viza bekor qilish bo‘yicha ro‘yxat tayyorlangan. U muntazam ravishda yangilab boriladi. Umid qilamizki, yaqin orada ro‘yxatga O‘zbekistonga ham kiritiladi”,— deydi Saudiya Arabistoni podshohligining O‘zbekistondagi elchisi.

Ta’kidlanishicha, Jidda va Toshkent shaharlariga muntazam reyslar amalga oshirish maqsadida haftasiga ikki marotaba Saudiya Arabistoni tomonidan reyslar ham qo‘yilmoqda.

Avvalroq O‘zbekistonda Saudiya Arabistoni fuqarolari uchun 30 kunlik vizasiz rejim joriy qilinadi deb xabar berilgan edi.