АҚШ президенти Жо Байден Америка ҳукумати Россияни терроризм ҳомийси бўлган давлат деб тан олиши керак, деб ҳисобламайди. Бу ҳақда Meduza хабар бермоқда.
Reuters агентлиги мухбирининг тегишли саволига жавоб берар экан, Америка президенти: «Йўқ», — деб жавоб берди. У ўз позициясига аниқлик киритиб ўтирмади.
Россия Украина ҳудудига бостириб кирганидан кейин Украина унинг терроризм ҳомийси бўлган мамлакат сифатида тан олинишига эришишга ҳаракат қилишни бошлаганди.
Politico маълумотларига кўра, Россияга шундай мақом берилишини АҚШ Конгресси Вакиллар палатаси спикери Нэнси Пелоси талаб қилиб туриб олган. Бироқ Давлат департаменти бунга қарши чиқди ва бу, хусусан, Украина донини Қора денгиз орқали экспорт қилиш ҳақидаги битимга путур етказади, деб ҳисоблади.
Москва Вашингтонни мамлакатга терроризм ҳомийси мақоми берилган тақдирда, бу икки томонлама алоқаларда «орқага қайтмаслик нуқтаси» юзага келишига сабабчи бўлиши ҳақида огоҳлантирди.
Украинада уруш бошланганидан кейин Литва ва Латвия парламентлари Россияни терроризмни қўллаб-қувватловчи мамлакат деб эълон қилганди.
Июль охирида АҚШ Сенати Давлат департаментини Чеченистон, Грузия, Сурия ва Украинадаги воқеалар муносабати билан Россияни терроризмнинг ҳомийси сифатида тан олишга чақирувчи резолюцияни қабул қилган эди.
Украина президенти Владимир Зеленский америкалик ҳамкасби Жо Байден билан суҳбатда Россияни терроризмга ҳомийлик қилувчи давлат сифатида тан олишни сўради, деб ёзган эди Washington Post апрель ойида. Бунга жавобан Байден мазкур масалада аниқ баёнотлар бермаган ва расмий Москвага босим ўтказишнинг турли йўлларини кўриб чиқишга тайёрлигини таъкидлаган.
Шу кунгача АҚШ терроризм ҳомийси сифатида тўртта давлатни тан олган: Сурия (1979 йил декабрда), Эрон (1984 йил январда), Шимолий Корея (2017 йил ноябрда) ва Куба (2021 йил январда).
Бошқа давлатнинг терроризм ҳомийси сифатида тан олиниши бу давлат билан ўзаро муносабатларни қаттиқ чеклаш, унга мудофаа товарларини экспорт қилишни тақиқлаш, икки мақсадли маҳсулотлар (ҳам фуқаролик маҳсулотлари, ҳам қурол яратишда ишлатиладиган) экспортини назорат қилиш, молиявий ва бошқа чекловларни назарда тутади. Давлат департаменти веб-сайтида айтилишича, қарор, шунингдек, «терроризмга ҳомийлик қилувчи давлатлар билан савдо қилган шахслар ва мамлакатларни жазолайдиган бошқа санкциялар тўғрисидаги қонунларни» киритишни ҳам назарда тутади. Бу шуни англатадики, АҚШ санкциялари иқтисодиётнинг айрим тармоқлари билан чекланиб қолмайди, дея таъкидлади Politico.
Изоҳ (0)