3-sentabr, shanba kuni Pragada o‘n minglab odam yonilg‘i narxi oshishi oqibatida yuzaga kelgan yuqori darajadagi inflyatsiyaga qarshi chiqib, hukumatga qarshi namoyish uyushtirdi, deb yozadi Meduza. Politsiya hisob-kitoblariga ko‘ra, aksiyada taxminan 70 ming kishi qatnashgan.
Praga markazidagi Vatslav maydonida to‘planganlar orasida, BBC yozishicha, Rossiya prezidenti Vladimir Putinning surati tushirilgan futbolka kiyib olgan o‘ta o‘ng natsionalistlar, kommunistlar, kovid-skeptiklar, shuningdek, taniqli olimlar ham bo‘lgan. Namoyishchilarning ko‘pchiligi Pragaga boshqa joylardan kelgan.
O‘ta o‘ng guruhga tegishli namoyish tashkilotchilari ma’lum qilishicha, Chexiya harbiy jihatdan neytral bo‘lishi va gaz yetkazib beruvchilari bilan, shu jumladan, Rossiya bilan to‘g‘ridan to‘g‘ri shartnomalar tuzishi kerak. Namoyishchilar Chexiya hukumatini urush chog‘ida o‘z iqtisodiyoti zarariga Ukrainani qo‘llab-quvvatlagani uchun tanqid qildi. Aksiya ishtirokchilari hukumat Rossiyaga qarshi sanksiyalar kiritib, Ukrainani qo‘llab-quvvatlayotganini, ammo yonilg‘iga katta xarajatlar tufayli muammolarga duch kelayotgan chexiyaliklarga yordam bermayotganini aytdi.
“Namoyishimizning maqsadi — asosan energiya, ayniqsa elektr toki va gaz narxi masalasida o‘zgarishlarni talab qilish, bu muammo shu kuzda iqtisodiyotimizni vayron qiladi”, — dedi aksiya tashkilotchilaridan biti Irji Gavel. Namoyishchilar Chexiya hukumatini mamlakatni Yevroittifoq va NATOdan chiqarishga da’vat etdi. To‘planganlarning ba’zilari koronavirusga qarshi vaksinatsiyaga va muhojirlar qabul qilinishiga qarshi chiqdi.
Bosh vazir Pyotr Fiala Pragadagi namoyishni izohlar ekan, Vatslav maydonidagi noroziliklar “ekstremistik pozitsiyalarga yaqin bo‘lgan rossiyaparast kuchlar” tomonidan uyushtirilganini, ularning manfaatlari Chexiya manfaatlariga zid ekanini aytdi.
Namoyish bosh vazir Pyotr Fialaning hukumatiga parlamentda ishonchsizlik votumi e’lon qilinganidan keyin ertasi kuni bo‘lib o‘tdi. Muxolifat hukumatni inflyatsiya va yonilg‘i narxlari o‘sishiga qarshi kurashda harakatsizlik qilishda ayblab, ovoz berish jarayonini tashkil qildi.
Rossiya Ukrainaga qarshi urush boshlaganidan keyin Chexiya qariyb 400 ming ukrainalik qochqinlarni qabul qildi, shuningdek, Ukrainaga katta hajmda harbiy va gumanitar yordam taqdim etdi.
2-sentabr kuni Rossiyaning ”Gazpromi” “Shimoliy oqim” gaz quvurini noma’lum muddatga butunlay to‘xtatib qo‘ydi, u Rossiya Ukrainaga bostirib kirganidan keyin Yevropaga gaz yetkazib berish uchun asosiy quvurga aylanib qolgan edi. Gaz quvuri “Shimoliy oqim”ning ishlab turgan yagona turbinasida aniqlangan nosozliklar bartaraf etilguniga qadar ishlamaydi. 2022-yil yozida “Gazprom” turli bahonalar bilan “Shimoliy oqim” orqali yetkazib berish hajmini kamaytirgandi: 15-iyul kuni gaz yetkazish rejali ko‘rsatkichning 60 foizigacha, sal keyinroq esa 20 foizigacha qisqartirildi.
Izoh (0)