Turkiya va Isroil aviaqatnovlarni qayta tiklashga kelishib oldi, deya ma’lum qildi Isroil bosh vaziri Yair Lapid.
“Bugun hukumat Turkiya va Isroil o‘rtasida aviamuloqot o‘rnatish to‘g‘risidagi kelishuvni ma’qulladi. Bundan buyon Isroil samolyotlari Istanbulga, shuningdek, Turkiyaning boshqa punktlariga qo‘nishi va uchishi mumkin bo‘ladi”, — deb yozadi Lapid Twitter’da.
Isroil 2007-yilda Turkiya bilan aviaqatnovni to‘xtatgan edi, turk aviakompaniyalari esa Isroilga parvozlarini davom ettirgan, deb yozadi The Times of Israel. Gazeta Tel-Avivning bunday qaroriga Turkiya hukumatining Isroil maxsus xavfsizlik talablarini bajarishdan bosh tortganini sabab qilib ko‘rsatadi.
2022-yilda Isroil va Turkiya o‘n yildan buyon sovuqlashib kelayotgan munosabatlarni tiklashga kirishdi. Anqara va Tel-Aviv bir-birini terrorizmni qo‘llab-quvvatlashda ayblagan edi. Isroilga Turkiyaning G‘azo sektoridagi HAMAS guruhini qo‘llab-quvvatlashi yoqmasdi, Turkiya esa Isroilni “bosqinchi davlat” deb hisoblardi. 2018-yilda Turkiya Isroildagi elchisini chaqirib olgan va Isroil elchisini Turkiyadan chiqarib yuborgan.
2022-yilning iyun oyida Turkiya tashqi ishlar vaziri Mevlut Chavusho‘g‘li Isroil Tashqi ishlar vazirligining o‘sha paytdagi rahbari Lapid bilan uchrashgan. Natijada tomonlar ikki tomonlama munosabatlarning diplomatik darajasini elchi darajasiga ko‘tarishini ma’lum qildi.
17-avgust kuni Lapid Turkiya prezidenti Rajab Toyyib Erdo‘g‘on bilan telefon orqali muloqot qildi. Ular diplomatik munosabatlarni to‘liq tiklashga va ikki davlat elchilarini poytaxtlarga qaytarishga kelishib oldi.
Izoh (0)