3 сентябрь, шанба куни Прагада ўн минглаб одам ёнилғи нархи ошиши оқибатида юзага келган юқори даражадаги инфляцияга қарши чиқиб, ҳукуматга қарши намойиш уюштирди, деб ёзади Meduza. Полиция ҳисоб-китобларига кўра, акцияда тахминан 70 минг киши қатнашган.
Прага марказидаги Вацлав майдонида тўпланганлар орасида, BBC ёзишича, Россия президенти Владимир Путиннинг сурати туширилган футболка кийиб олган ўта ўнг националистлар, коммунистлар, ковид-скептиклар, шунингдек, таниқли олимлар ҳам бўлган. Намойишчиларнинг кўпчилиги Прагага бошқа жойлардан келган.
Ўта ўнг гуруҳга тегишли намойиш ташкилотчилари маълум қилишича, Чехия ҳарбий жиҳатдан нейтрал бўлиши ва газ етказиб берувчилари билан, шу жумладан, Россия билан тўғридан-тўғри шартномалар тузиши керак. Намойишчилар Чехия ҳукуматини уруш чоғида ўз иқтисодиёти зарарига Украинани қўллаб-қувватлагани учун танқид қилди. Акция иштирокчилари ҳукумат Россияга қарши санкциялар киритиб, Украинани қўллаб-қувватлаётганини, аммо ёнилғига катта харажатлар туфайли муаммоларга дуч келаётган чехияликларга ёрдам бермаётганини айтди.
«Намойишимизнинг мақсади — асосан энергия, айниқса электр токи ва газ нархи масаласида ўзгаришларни талаб қилиш, бу муаммо шу кузда иқтисодиётимизни вайрон қилади», — деди акция ташкилотчиларидан бити Иржи Гавел. Намойишчилар Чехия ҳукуматини мамлакатни Евроиттифоқ ва НАТОдан чиқаришга даъват этди. Тўпланганларнинг баъзилари коронавирусга қарши вакцинацияга ва муҳожирлар қабул қилинишига қарши чиқди.
Бош вазир Пётр Фиала Прагадаги намойишни изоҳлар экан, Вацлав майдонидаги норозиликлар «экстремистик позицияларга яқин бўлган россияпараст кучлар» томонидан уюштирилганини, уларнинг манфаатлари Чехия манфаатларига зид эканини айтди.
Намойиш бош вазир Пётр Фиаланинг ҳукуматига парламентда ишончсизлик вотуми эълон қилинганидан кейин эртаси куни бўлиб ўтди. Мухолифат ҳукуматни инфляция ва ёнилғи нархлари ўсишига қарши курашда ҳаракатсизлик қилишда айблаб, овоз бериш жараёнини ташкил қилди.
Россия Украинага қарши уруш бошлаганидан кейин Чехия қарийб 400 минг украиналик қочқинларни қабул қилди, шунингдек, Украинага катта ҳажмда ҳарбий ва гуманитар ёрдам тақдим этди.
2 сентябрь куни Россиянинг »Газпроми» «Шимолий оқим» газ қувурини номаълум муддатга бутунлай тўхтатиб қўйди, у Россия Украинага бостириб кирганидан кейин Европага газ етказиб бериш учун асосий қувурга айланиб қолган эди. Газ қувури «Шимолий оқим»нинг ишлаб турган ягона турбинасида аниқланган носозликлар бартараф этилгунига қадар ишламайди. 2022 йил ёзида «Газпром» турли баҳоналар билан «Шимолий оқим» орқали етказиб бериш ҳажмини камайтирганди: 15 июль куни газ етказиш режали кўрсаткичнинг 60 фоизигача, сал кейинроқ эса 20 фоизигача қисқартирилди.
Изоҳ (0)