Boltiq dengizida Cessna 551 xususiy samolyoti halokatga uchradi, deb yozadi Meduza. Reuters Shvetsiya qutqaruv xizmatiga tayanib xabar berishicha, u Latviya qirg‘oqlari yaqiniga, Venspilsdan uzoq bo‘lmagan joyga qulagan.
Avstriyada ro‘yxatdan o‘tgan samolyot 4-sentabr kuni Ispaniya janubidagi Xeres shahridan uchib chiqqan va Germaniyaning Kyoln shahriga qo‘nishi kerak edi. Uning bortida to‘rt kishi bo‘lgan.
Samolyot havoga ko‘tarilganidan keyin uchuvchi salondagi bosim bilan bog‘liq muammolar haqida xabar bergan, so‘ng aloqaga chiqmay qo‘ygan. Parvoz chog‘ida samolyot ikki marta — Parijda va Kyolnda burilib olgan, Boltiq dengizi ustidan, Shvetsiyaning Gotland oroli yaqinidan uchib o‘tgan. So‘ng tezligi va balandligini yo‘qota boshlagan, oxir-oqibat Latviya qirg‘oqlari yaqiniga qulagan.
Ispaniya, Fransiya, Germaniya va Daniyada qiruvchi samolyotlar uchuvchilari ushbu xususiy samolyot bilan aloqaga chiqishga uringan. Ammo ular Cessna kabinasida ham, salonida ham hech kimni ko‘ra olmagan.
Keyinroq ma’lum bo‘lishicha, halokatga uchragan xususiy samolyot bortida aerotaksi va tibbiy samolyotlar ijarasi xizmatlarini taqdim etuvchi Quick Air aviakompaniyasi xo‘jayini Karl-Peter Grizemann rafiqasi, ikki farzandi va ikki iti bilan bo‘lgan. Samolyotni Grizemanning o‘zi boshqargan.
Quick Air’ga 1992-yilda asos solingan. U Griesemann Aviation Group guruhiga kiradi, u esa o‘z navbatida Griesemann Group’ning bir qismi hisoblanadi, u esa zavodlarni loyihalashtirish va qurishga ixtisoslashgan xalqaro kompaniyadir.
Izoh (0)