Кобулдаги портлаш оқибатида Россия элчихонасининг икки ходими ҳалок бўлди, деб ёзади «РБК» Россия Ташқи ишлар вазирлигига таяниб.
«Кобулдаги Россия элчихонасининг консуллик бўлимига кириш дарвозасининг бевосита яқинида номаълум жангари портловчи қурилмани ҳаракатга келтирди. Ҳужум оқибатида дипломатик миссиянинг икки ходими ҳалок бўлди, Афғонистон фуқаролари орасида ҳам жабрланганлар бор», — дея маълум қилишди идорадагилар.
«РИА Новости» манбаси эса аввалроқ бир дипломат ва дипломатик миссия соқчиларидан бири ҳалок бўлганини маълум қилганди.
«Известия» манбасига кўра, элчихонанинг иккинчи котиби Михаил Шах ҳалок бўлган. Жабрланган соқчи эса касалхонада вафот этган.
Россия ТИВ Афғонистон хавфсизлик хизматлари билан алоқада бўлиб турибди, улар текширув олиб бормоқда.
Портлаш 5 сентябрь куни аввалроқ юз берганди. «РИА Новости» манбаси жами 15—20 киши ҳалок бўлгани ва жабрлангани ҳақида хабар берганди. Al Jazeera эса Афғонистон хавфсизлик хизматларидаги манбасига таяниб, саккиз киши ҳалок бўлиб, 15 киши яраланганини маълум қилди. Ал Арабиа ўн нафар қурбон ҳақида хабар бермоқда.
Шаҳар полицияси вакили Халид Задаран айтиб беришича, худкуш Россия элчихонаси яқинида тўпланган одамлар орасига кириб ўзини портлатмоқчи бўлган. Аммо нишонга бориб етмасидан, у хавфсизлик кучлари томонидан ўлдирилган, худди шу пайтда портлаш юз берган.
Россия президенти матбуот котиби Дмитрий Песков ҳодисани теракт деб атади. «Шубҳасиз, гап теракт ҳақида бормоқда. Биз бундай террорчилик ҳаракатларини қатъиян қоралаймиз. Ва, албатта, ҳозир қилиш керак бўлган асосий нарса — воқеа жойидан бизнинг вакилларимиз, бизнинг дипломатларимизга нима бўлгани ҳақида маълумот олиш», — деди у журналистларга.
Мавзуга доир: Кобулдаги Россия элчихонаси яқинида портлаш юз берди
Изоҳ (0)