Калифорния шимолидаги Сискиёу округида юз берган катта ёнғин туфайли минглаб одамлар эвакуация қилинди. Бир неча киши яраланди, уйлар вайрон бўлди. Ўт ўчирувчилар штат жанубидаги ёнғинлар билан ҳам курашмоқда, деб ёзади Euronews телеканали.
Калифорнияда ҳаддан ташқари иссиқ об-ҳаво қайд этилди, минтақа қурғоқчиликдан азият чекмоқда. Айрим ҳудудларда ҳаво ҳарорати Цельсий бўйича 45 даражага етади.
Лос-Анжелеснинг камбағал туманларида расмийлар маҳаллий аҳоли иссиқда салқинлаши ва сув ичиши мумкин бўлган махсус марказлар очди.
«Уйимизда кондиционер йўқ, фақат вентилятор бор. Уйда ўтириб бўлмагани учун бу ерга келдик», — дейди маҳаллий фуқаролардан бири.
«Ҳаво ҳарорати жуда қизиб кетганда, биз Миллий об-ҳаво хизмати билан келишган ҳолда олдиндан тайёрланган чора-тадбирларни амалга оширамиз, қутқарув гуруҳларини тўплаймиз, керакли нарсаларни олиб келамиз, барча марказларнинг тайёрлигини текширамиз, уларнинг сони етарли», — дейди Фавқулодда вазиятлар бўлими вакили Жозеф Райзер.
Калифорнияликлардан электр токи узилишининг олдини олиш учун электр энергиясини камроқ истеъмол қилиш сўралди. Рекорд иссиқлик тўлқини яна бир неча кун давом этиши айтилмоқда.
Изоҳ (0)