Rossiyalik va armanistonlik tadbirkor va investor Ruben Vardanyan tan olinmagan Tog‘li Qorabog‘ Respublikasiga ko‘chib o‘tganini ma’lum qildi, deb yozadi Meduza. Ushbu respublika hududi yozib olingan videomurojaatda Vardanyan Rossiya fuqaroligidan voz kechganini ma’lum qildi.
“Qanday risklarni o‘z zimmamga olayotganimni tushungan holda, Rossiya fuqaroligidan voz kechib, Armaniston fuqarosi sifatida Arsax (Tog‘li Qorabog‘ning armancha nomi)ga ko‘chib o‘tishga qaror qildim. Bu qarorni qabul qilish men uchun oson bo‘lmadi, ammo to‘g‘ri ish tutdim”, — dedi Vardanyan.
Vardanyanning so‘zlariga ko‘ra, so‘nggi ikki yil ichidagi voqealar tufayli, Tog‘li Qorabog‘ aholisining ko‘pchiligida loqaydlik va “tashlab ketilganlik, hech kimga kerak emaslik tuyg‘usi” paydo bo‘lgan. “Buni nomaqbul deb hisoblayman. 2020-yilgi urushdan keyin biz, butun dunyodagi armanlar, arsaxliklar bilan birga bo‘lishimiz shart”, — dedi tadbirkor.
Ruben Vardanyan “RBK”ga ma’lum qilishicha, Rossiyadagi aktivlarining barchasini oilaviy fondiga o‘tkazadi: “Hammasini sheriklarimning boshqaruviga berib, oilaviy fondga o‘tkazaman”.
Ruben Vardanyan — “Troyka Dialog” investitsion kompaniyasining sobiq egasi, “Skolkovo” biznes-maktabi asoschisi. 2021-yilda Forbes jurnali uning boyligini bir milliard dollarga baholagan, u Rossiyaning 200 nafar eng boy odamlari ro‘yxatida 116-o‘rinni egallagan edi.
2019-yil martida OCCRP (Korrupsiya va uyushgan jinoyatchilikni tadqiq qilish loyihasi — OAVlar va muxbirlar birlashmasi) “Troyka Dialog” ofshor kompaniyalar tizimi haqidagi surishtiruvini e’lon qildi, u orqali Rossiyadagi eng nufuzli odamlarga, shu jumladan, Vladimir Putinning do‘sti Sergey Rolduginga maxfiy ravishda pul o‘tkazilgan. 2006—2013-yillarda ushbu kompaniyalar hisoblari orqali 4,5 milliard dollardan ortiq mablag‘ o‘tgan. Surishtiruv e’lon qilinganidan keyin Yevroparlament deputatlari Ruben Vardanyanga qarshi sanksiyalar kiritishni talab qildi.
Izoh (0)