АҚШ президенти Жо Байден америкаликларга йўллаган мурожаатида ўзидан аввалги давлат раҳбари Дональд Трамп ва унинг тарафдорларини «мамлакат учун таҳдид» деб атади. Бу ҳақда Meduza хабар бермоқда.
«Дональд Трамп ва MAGA-республикачилар (MAGA — Make America Great Again (Американи яна буюк қиламиз) — Дональд Трамп ва тарафдорларининг шиори) мамлакатимизнинг негизига хавф соладиган экстремизм тимсолидир», — деди у.
Байденнинг фикрича, Трампнинг тарафдорлари 2020 йилги президент сайлови якунларини тан олмасдан, «конституцияни ҳурмат қилмайди ва қонун устуворлигига ишонмайди», шунингдек, мамлакатни ўтмишга, «танлаш ҳуқуқи бўлмаган, шахсий ҳаёт ҳуқуқи бўлмаган, контрацепсия ҳуқуқи бўлмаган, ўзинг севган инсон билан турмуш қуриш ҳуқуқи бўлмаган» даврларга қайтаришга уринмоқда.
Шунингдек, АҚШ президенти айтишича, Трамп тарафдорлари орасидаги таниқли инсонлар деярли оммавий тартибсизликларга даъват этмоқда. «Америкада сиёсий зўравонликка ўрин йўқ. Нуқта», — деди у.
Байден қайд этишича, айтилган гаплар республикачиларнинг ҳаммасига ҳам тегишли эмас, бироқ Трамп ва унинг тарафдорлари Республикачилар партиясида устунликни қўлга киритган ва уларни «қўрқитиб қўйган», деди у.
Республикачилар партияси президентни нутқи учун танқид қилди ва уни жамият орасига нифоқ солишда айблади.
Politico Байденнинг нутқини бутун президентлиги давридаги энг кескинларидан бири деб атади. Нашр унинг чиқишини ноябрда бўлиб ўтадиган Конгрессга сайловлар учун «ставкаларни белгилаб олиш»га уриниш деб талқин қилди. The New York Times ёзишича, Байденнинг жамоаси сайловни амалдаги президент дастури ва Трамп тарафдорларининг экстремизми ўртасидаги «ҳаётий муҳим танлов» деб тақдим этмоқчи.
АҚШ собиқ президенти Дональд Трамп Америка сиёсатидаги энг таъсири кучли шахс бўлиб қолмоқда; Америка ОАВлари ёзишича, унинг қўллаб-қувватлаши Республикачилар праймеризда ҳозиргача ҳам ҳал қилувчи аҳамиятга эга. Сўнгги ҳафталарда ФҚБ унинг уйида ўтказган тинтувлар ва эҳтимолий жиноий таъқиб туфайли Трампнинг исми янгиликларда тез-тез тилга олинмоқда.
Изоҳ (0)