OceanGate Expeditions loyihasi olimlari cho‘kib ketgan “Titanik” kemasini birinchi marta 8K sifatida tasvirga oldi, deb yozadi “RBK”.
Noyob videotasvir mutaxassislarga 100 yildan oldinroq halokatga uchragan kemaning asta-sekinlik bilan yemirilishi tabiatini yaxshiroq o‘rganishda yordam beradi.
Metro xabariga ko‘ra, kema besh kishi uchun mo‘ljallangan OceanGate Titan suvosti qurilmasi yordamida tadqiq qilingan. Batiskaf (chuqur suv ostida yuradigan qurilma, kamera) 4 ming metrdan ziyod chuqurlikka tusha oladi — “Titanik” ham taxminan shunday chuqurlikda joylashgan.
Ekspeditsiya shu yilning may oyida bo‘lib o‘tgan, o‘shanda layner Shimoliy Atlantikada halokatga uchragan joyga Kanadaning Nyufaundlend orolidan tadqiqot kemasi jo‘nab ketgan. Olimlar sakkiz kun davomida ochiq dengizda bo‘lgan. Ekspeditsiyada tijoriy mijozlar ham qatnashgan, dengiz sayohati ularning har biriga 250 ming dollarga tushgan.
Detallashtirilgan tasvirga olishga yangicha yondashuv 1912-yil bahorida cho‘kib ketgan kemaning ko‘plab unsurlarini ko‘rish imkonini berdi. Masalan, kema langariga tushirilgan Noah Hingley & Sons Ltd. yozuvini ko‘rish mumkin bo‘ldi. Bundan tashqari, okean qa’ridan olimlar laynerning ulkan bug‘ qozonlaridan birini topdi.
OceanGate Expeditions kompaniyasi suv ostida “Titanik”ni maksimal darajada yuqori aniqlikda suratga olish ishlarini davom ettirmoqchi. Ekspeditsiya 2023-yil may oyiga mo‘ljallangan.
Izoh (0)