Global Peace Index reytingi bo‘yicha dunyo mamlakatlarining xavflilik darajasi e’lon qilindi, deb yozadi Asia Plus.
2022-yilgi ma’lumotlarga ko‘ra, reytingga kiritilgan 163 ta mamlakat ichida Afg‘oniston oxirgi o‘rinni egalladi. Rossiya 160-o‘rinda joylashdi. Rossiya qurolli kuchlari olti oydan buyon maxsus harbiy operatsiya o‘tkazayotgan Ukraina esa 153-o‘rinni band qildi. Ushbu uchta mamlakatning barchasi eng xavfli mamlakatlar guruhiga kirdi.
Turkmaniston 104, Qozog‘iston 97, Tojikiston 92, Qirg‘iziston 91-o‘rinda joylashdi. Markaziy Osiyo mamlakatlari ichida O‘zbekiston eng xavfsizi bo‘ldi — 86-o‘rin.
Markaziy Osiyo mamlakatlarining barchasi Isroil, AQSH va Turkiya kabi davlatlardan xavfsizroq bo‘lib chiqdi.
Reytingning eng yuqori uchta o‘rnini Islandiya, Yangi Zelandiya va Irlandiya band etdi.
Global Peace Index reytingi har yili Tinchlik instituti ekspertlari xalqaro guruhining jamiyatshunoslari va iqtisodiyotchilari tomonidan Sidney universiteti Tinchlik va ziddiyatlarni o‘rganish markazi bilan hamkorlikda ishlab chiqiladi.
Ekspertlar yakuniy indeksni tuzish uchun ichki va tashqi ziddiyatlar, ularning jadalligi va qurbonlar soni; qo‘shni mamlakatlar bilan aloqalar; aholi orasida qochqinlar ulushi; fuqarolar o‘rtasida ishonchsizlik darajasi; siyosiy beqarorlik va jamoat tartibi; siyosiy terror; teraktlar yuz berish tezligi; har 100 ming kishiga qotilliklar soni; mahbuslar soni; og‘ir jinoyatlar ulushi kabi ko‘rsatkichlarni o‘rganib chiqadi.
Izoh (0)