O‘zbekistonda 15 yildan ortiq mehnat stajiga ega oliy toifali pedagoglarning joriy yil o‘tkazilgan attestatsiya jarayonlarida ishtirok etmagani natijasida mavjud malaka toifasini yo‘qotgani haqida xabarlar tarqaldi. XTV matbuot kotibi ularning oliy toifa malakasi umrbod saqlab qolinishini bildirdi.
XTV matbuot kotibining bildirishicha, Vazirlar Mahkamasining 2022-yil 2-avgustdagi 425-sonli qarori bilan hukumatning 2021-yil 17-sentabrdagi 572-sonli qaroriga kiritilgan tegishli o‘zgartirishga ko‘ra, oliy malaka toifa (bosh o‘qituvchi lavozimi)ga ega bo‘lganidan so‘ng oliy malaka toifani 15 yil davomida saqlab kelgan va uzluksiz ish stajiga ega bo‘lgan pedagog kadrlar navbatdagi majburiy attestatsiyaga jalb etilmasligi belgilangan.
2022-yil mart—may oylarida malaka toifasi olish uchun o‘tkazilgan attestatsiya davrida amalda bo‘lgan tartibga asosan, 15 yillik uzluksiz ish stajiga ega bo‘lgan oliy malaka toifaga ega pedagoglarning attestatsiyadan o‘tishi majburiy bo‘lmagan va ularning oliy toifa malakasi umrbod saqlab qolinishi belgilangan.
“ ‘Normativ-huquqiy hujjatlar to‘g‘risida’gi qonuniga asosan, normativ-huquqiy hujjatlar orqaga qaytish kuchiga ega emasligi belgilangani munosabati bilan, 2022-yil mart—may oylarida o‘tkazilgan attestatsiya davrida 15 yillik uzluksiz ish stajiga ega bo‘lgan oliy malaka toifali o‘qituvchilarning mavjud toifalari umrbod saqlanib qolinishini ma’lum qilamiz”, — deyiladi xabarda.
Izoh (0)