Хитойнинг Чунцин шаҳрида Aedas меъморчилик студияси лойиҳаси асосида қайрилма фасадга эга Dance of Light («Ёруғлик рақси») осмонўпар офис биноси фойдаланишга топширилди, деб ёзади «РБК». 180 метр баландликка эга 39 қаватли минора Цзянбей туманида жойлашган.
Aedas меъморчилик студияси аниқлик киритишича, бинонинг ҳар битта қавати 8,8 даражагача «қайрилиш бурчаги»га эга бўлиб, бу бошқа ҳар қандай қайрилма осмонўпар биноникидан каттароқ кўрсаткичдир.
Бинонинг 34 та қаватида офислар жойлашган, яна бешта қават эса конференц-заллар ва тадбирлар заллари учун ажратилган.
«Dance оf Light концепцияси табиатдаги шимол ёғдуси ҳодисасидан илҳомланган. Бинонинг ҳар битта бурчагидаги иккита қарама-қарши бурилишларнинг интеграцияси туфайли фасад шаҳар контекстида мунтазам ўзгариб туради», — деди Aedas бош дизайнери Кен Вай.
Dance оf Light — дунёдаги биринчи спиралсимон осмонўпар бино эмас. Шундай шаклга эга энг баланд бино Дубайда жойлашган Infinity Tower бўлиб ҳисобланади. 76 қаватли бинонинг баландлиги 306 метр бўлиб, ҳар битта қават 1,2 даражага силжиган.
Энг биринчи спиралсимон осмонўпар бинолардан бири — Turning Torso Швециянинг Мальмё шаҳрида жойлашган. 54 қаватли 190 метрли бино испаниялик меъмор Сантьяго Калатрава томонидан ишлаб чиқилган ва 2005 йилда қуриб битказилган.
«Москва-Сити» ишбилармонлик маркази таркибига кирувчи 55 қаватли «Эволюция» минораси ҳам қайрилма шаклга эга бўлиб, 246 метрли бинонинг ҳар битта қавати ўзидан аввалги қаватга нисбатан 3 даражага қайрилган.
Изоҳ (0)