Farg‘ona shahridagi Islom Karimov nomidagi viloyat teatr-konsert saroyining ochiq maydonida O‘zbekiston Respublikasi davlat mustaqilligining 31 yilligiga bag‘ishlangan bayram tadbiri bo‘lib o‘tdi. Mazkur tantanali marosimda ishtirok etgan “Daryo” muxbirlari tadbirning e’tiborga molik lahzalarini suratga oldi.
Tantanali tadbir avvalida O‘zbekiston mustaqilligining o‘ttiz bir yilligi munosabati bilan faxriy unvon, orden va medallar bilan taqdirlangan 23 nafar farg‘onalik fuqaroga davlatning yuksak mukofotlari topshirildi.
Shuningdek, 56 nafar tashabbuskor fuqaro va jamoatchilik tuzilmalari vakillari “Mahalla iftixori” ko‘krak nishoni bilan taqdirlandi. “Mahalla iftixori” ko‘krak nishoni sohiblariga “Mahalla” xayriya jamoat fondi tomonidan bir yo‘la to‘lanadigan pul mukofoti hamda sanatoriylarda davolanish uchun bir martalik bepul yo‘llanmalar berildi.
“Yangi O‘zbekistonda el aziz, inson aziz!” shiori ostida o‘tkazilgan badiiy-musiqiy, teatrlashtirilgan bayram tadbirida viloyatning barcha tuman va shaharlaridan taklif etilgan davlat, jamoat tashkilotlari, ta’lim muassasalari vakillari, mehnat faxriylari, harbiylar, faol yoshlar ishtirok etdi.
Viloyat hokimi Xayrullo Bozorov tantana qatnashchilarini va ularning timsolida barcha farg‘onaliklarni mamlakatimiz mustaqilligining o‘ttiz bir yilligi bilan qutladi.
Xayrullo Bozorov viloyatda qurilish, bunyodkorlik, sanoat, qishloq xo‘jaligi, iqtisodiy-ijtimoiy sohalarda erishilayotgan yutuqlarni alohida iftixor bilan qayd etdi.
Bayram tantanalari estrada xonandalari, taniqli san’atkorlar badiiy jamoalar hamda milliy madaniy markazlar ijodkorlari tomonidan namoyish etilgan konsert dasturi va teatrlashtirilgan tomoshalar bilan davom etdi.
Sportchilar, quvnoq bolajonlar, harbiy xizmatchilarining ko‘rgazmali chiqishlari va bayram mushakbozligi barchaga o‘zgacha zavq bag‘ishladi.
Izoh (0)