Ko‘z mikroxirurgiyasi markazi mutaxassislari Qashqadaryo viloyatida yuzdan ortiq yuqori texnologiyali operatsiyani amalga oshirdi. Bu haqda Sog‘liqni saqlash vazirligi matbuot xizmati xabar bermoqda.
Respublika ixtisoslashtirilgan ko‘z mikroxirurgiyasi ilmiy-amaliy tibbiyot markazi Qashqadaryo viloyat filialida malakali mutaxassislar tomonidan yuqori texnologiyali jarrohlik amaliyotlari o‘tkazib kelinmoqda. Davlat tibbiy sug‘urta jamg‘armasi bilan birgalikda amalga oshirilayotgan bunday operatsiyalar soni yuztadan oshgan.
Kuni kecha poytaxtlik malakali xirurglar tomonidan viloyatda zamonaviy fakoemulsifikator uskunasi yordamida 16 ta yuqori texnologiyali operatsiya o‘tkazildi, 50 nafardan ortiq bemorga zarur tibbiy maslahatlar berildi.
Davlat hisobidan o‘tkazilgan ushbu amaliyotlar mustaqillikning 31 yilligi bayrami arafasida bemorlar va ularning yaqinlariga quvonch ulashishi shubhasiz, — deyiladi vazirlik xabarida.
Izoh (0)